Финансии / Банкарство
КОМЕРЦИЈАЛНА БАНКА НЕ УСПЕА ДА ЈА ПРЕЗЕМЕ СТОПАНСКА БАНКА БИТОЛА
24.09.2024
Управниот одбор на Комерцијална банка АД Скопје денеска до Македонска берза достави Известување за исходот за преземање на Стопанска банка АД Битола, во кое информира дека „не е постигнат прагот на успешноста“ со што пропадна и обидот за преземањето на битолската банка.
Причина за неуспешност е тоа што не се изјаснија позитивно по однос на понудата на Банката доволен број акционери кои поседуваат обични акции со право на глас, односно во законски утврдениот рок до 22.09.2024 година не дадоа Изјава за прифаќање на понуда за откуп по цена од 3.200 денари по акција, информираат од Комерцијална банка.
Понудата за преземање беше прифатена од 149 (сто четириесет и девет) сопственици на обични акции со право на глас, кои поседуваат вкупно 176.154 обични акции, односно 45,0548% од сите акции со право на глас издадени од Стопанска банка АД Битола.
Понудата за преземање се однесуваше на сите 390.977 обични акции со право на глас издадени од Стопанска банка АД Битола. Во Понудата за преземање, прагот на успешност, односно најмалата количина обични акции која требаше да биде прифатена за да се смета за успешна понудата за преземање беше определена на 261.956 обични акции со право на глас, што претставува 67 % плус 1 акција од вкупниот број обични акции со право на глас издадени од Стопанска банка АД Битола, се наведува во известувањето на Комерцијална банка, доставено до Македоднската берза.