Финансии / Банкарство
БОГАТИТЕ ЗЕМЈИ ДА ПРЕЗЕМАТ ГЛОБАЛНА АКЦИЈА ЗА ОДАНОЧУВАЊЕ НА 3.000 МИЛИЈАРДЕРИ, апел на министерот за економија на Шпанија Карлос Куерпо
18.11.2024
Министерот за економија на Шпанија Карлос Куерпо ги повика најбогатите земји во светот да „бидат храбри“ и да ги зголемат напорите за да се постигне договор за глобалното минимално оданочување на 3.000 милијардери. Неодамнешните избори покажуваат дека граѓаните бараат „редистрибуција на богатството“, изјави тој при неговата посета на Лондон пред денешниот состанок на лидерите на Г20 во Рио де Жанерио, пренесуваат западните медиуми.
Планот за глобалното оданочување добил политичка поддршка, кога министрите за финансии се договориле да соработуваат за да се обезбеди „ултрабогатите поедници да бидат ефикасно оданочени“, пренесува лондонски „Гардијан“.
Очекувањата се дека Бразил, кој го поддржува предлогот за собирање на околу 250 милијарди долари годишно од милијардерите ширум светот, со нивно оданочување од најмалку два отсто на имотот кој го поседуваат, ќе побара официјални преговори за глобалните даноци на богатството кога ќе биде домаќин на наредниот самит на ОН за климатски промени (СОП).
Франција, Германија и Јужна Африка изразиле поддршка за овој предлог, соопштувајќи дека парите се потребни за помош на земјите кои се загрозени на климатските промени и за потикнување на зелените инвестиции, пренесува „Еуроњуз“.
фото freepic