Вести
На горештините скопјани трошат по 700 литри вода на ден, препораки за штедење на водата и заштита на здравјето
03.07.2025
Топлото време ги натера скопјани да трошат повеќе вода од вообичаено. Јавното преттпријатие „Водовод и канализација – Скопје“ информира дека потрошувачката осебено се зголемува во попладненвите часови.
Официјалните податоци од мерењата на претпријатието покажуваат дека само на 23 јули дневната потрошувачка на вода изнесувала рекордни 356.000 кубни метри, што значи потрошувачка од 700 литри вода по глава на жител.
Од Водовод апелираат граѓаните совесно и рационално да ја користат водата.
– Особено да се избегнува непотребно трошење на водата за полевање на зеленило, бавчи и ниви, за перење автомобили, за полнење на базени – велат од Водовод.
Под влијание на топла воздушна маса од југ, од денеска до средината на следната седмица, времето ќе биде сончево и многу топло со мала до умерена облачност. Дневната температура насекаде ќе биде над 30 степени Целзиусови, а наместа ќе надминува 40 степени Целзиусови, соопштија од Управата за хидрометеоролошки работи.
Во недела во попладневните и вечерните часови ќе има услови за локална нестабилна облачност со пороен дожд и грмежи.
Институтот за јавно здравје деновиве излезе со препораки за заштита на повозрасните од топлото време.
Се апелира повозрасните да избегнуваат изложување на сонце, како и работа на отворено, во периодот од 11 до 17 часот. Да носат лесна, светла и памучна облека, заштитни очила за сонце, капа со висок свод и широк обод и крем со УВ фактор 30+ при изложување на сонце. Да се пие повеќе од вообичаено и да не се чека додека не се почувствува жед за вода. Алкохолните пијалаци да се избегнуваат, како и оние што содржат кофеин, но и екстремно ладните. Доколку лекарот им има поставено некои ограничувања за внес на течности, да се консултираат со него.
Се препорачува да се избегне користење шпорет, рерна и слични уреди од 11 до 17 часот.
- Хроничните болни, посебно оние со болести на кардиоваскуларниот систем, невролошките и белодробните болести, потребно е да бидат посебно дисциплинирани по однос на овие препораки и да ја земаат својата редовна терапија, нагласуваат од ИЈЗ.
За сите промени во здравствената состојба, како што се истакнува, задолжително да се консултира избраниот матичен лекар.