Финансии / Банкарство
Словенија ќе ја оданочува добивката од криптовалути
19.07.2025
Владата на Словенија го одобри предлогот за закон за данок на добивка од продажба на крипто средства и предлогот за измена на законот за данок на добивка од стекнување на деривативни финансиски инструменти.
Добивката од продажба или размена на криптовалути за услуги и стоки, остварена од физички лица со живеалиште во Словенија во дадена даночна година, ќе биде оданочена. Сепак, добивката остварена од крипто средства што се дел од компанија на физичко лице со која самостојно ја извршува својата дејност нема да биде оданочена на овој начин и тоа спаѓа во даноците на доход. Добивката ќе биде оданочена со 25%, а тоа е конечна стапка што нема да се намалува во текот на годините на сопственост (како кај акциите).
Даночната основа е остварената добивка, а тоа е разликата помеѓу збирот на вредноста за време на располагањето со крипто средствата отуѓени во даночната година и збирот на вредностите за време на стекнувањето со крипто средствата стекнати во даночната година. Кога разликата е негативна, т.е. загуба, вишокот на вредност при стекнување крипто средства се пренесува во следната даночна година. Даночните обврзници ќе бидат обврзани да водат евиденција за стекнувањето и располагањето со крипто средства за сите инвестиции во крипто средства и да ги достават до даночната администрација. Инвестициите во крипто средства до илјада евра нема да се оданочуваат.
Законот ќе се применува за даночни години што почнуваат на или по 1 јануари 2026 година, што значи дека ќе плаќате данок за прв пат во средината на 2027 година. Ќе биде потребна меѓународна размена на информации за плаќања со крипто средства ако поединечната вредност е поголема од 50.000 евра. Известувањето до Даночната администрација ќе биде потребно од илјада евра па натаму, пренесува Сеебиз.
фото freepic