Финансии / Банкарство
Притисоците врз ФЕД носат „значајни“ ризици за финансиските пазари и економијата, предупреди Оли Рен, членот на Управниот совет на Европската централна банка
28.08.2025
Членот на Управниот совет на Европската централна банка (ЕЦБ), Оли Рен, денеска предупреди дека поткопувањето на независноста на американската централна банка носи „значајни“ ризици за финансиските пазари и економијата.
„Независноста на Федералните резерви е неприкосновен принцип уште од осумдесеттите години на минатиот век, кога беше содржана двоцифрената инфлација. Сега тој принцип е поткопан“, рече Рен за време на говорот во финскиот град Турку.
Тој истакна дека довербата во централната банка им овозможува на граѓаните, компаниите и пазарите да веруваат во стабилноста на цените, објавува Блумберг.
Рен нагласи дека кредибилитетот на банката, кој носи независност, ја зголемува ефикасноста на монетарната политика и им овозможува на централните банки да не мора да реагираат на привремени нарушувања со „остри мерки“.
Неговите изјави доаѓаат во време кога американскиот претседател Доналд Трамп врши притисок врз Федералните резерви да ги намалат каматните стапки, а оваа недела отиде чекор понатаму кога ја отпушти гувернерката Лиза Кук по обвинувањата за фалсификување на хипотекарни документи.
Загриженоста поради потезите на американскиот претседател Доналд Трамп ја разниша довербата кај германските мали инвеститори на американскиот берзански пазар, според анкетата на Tradegate.direct.
Репрезентативна онлајн анкета беше спроведена во јули меѓу приближно 2.000 сопственици на акции.
Анкетата покажа дека приближно три четвртини од испитаниците, 76,3 проценти, рекле дека нивната доверба во американскиот берзански пазар се намалила поради администрацијата на Трамп, при што 46 проценти рекле дека нивната доверба е сериозно нарушена.
Понатаму, приближно 40 проценти од инвеститорите рекле дека откако Трамп ја презеде функцијата во јануари, ги префрлиле своите инвестиции во средства што се сметаат за безбедни засолништа за капиталот, како што се златото и другите скапоцени метали (19,3 проценти) или обврзниците (18 проценти), пренесува Индекс.хр.