Финансии / Банкарство
ГУВЕРНЕРОТ НА ФЕД ОЧЕКУВА НАМАЛУВАЊЕ НА КАМАТИТЕ ОД 3 ДО 6 МЕСЕЦИ
29.08.2025
Гувернерот на Федералните резерви на САД, Кристофер Волер, изјави дека сака да започне со намалување на каматните стапки во САД од следниот месец и „целосно очекува“ дека ќе следат понатамошни намалувања на стапките.
- Врз основа на она што го знам во моментов, би поддржал намалување на стапката од 25 базични поени на претстојниот состанок на Комитетот за отворен пазар на Федералните резерви на 16-17 септември за утврдување на стапките, изјави тој во Економскиот клуб во Мајами.
Волер рече дека не мисли дека Федералните резерви ќе треба да ги намалат каматните стапки за повеќе од една четвртина од еден поен следниот месец, истакнувајќи дека тој став би можел да се промени ако извештајот за вработување на Министерството за труд за август, кој треба да биде објавен следниот петок, покаже дека економијата значително ослабела и дека инфлацијата останува под контрола.
- Дојде време да се олабави монетарната политика и да се премине кон понеутрален став... Очекувам понатамошни намалувања во следните три до шест месеци, а темпото на намалување на каматните стапки ќе биде водено од податоците што ќе доаѓаат, рече Волер.
Очекувањата на гувернерот на ФЕД се каматите да бидат околу 3 проценти, што е околу 1,25 до 1,50 процентни поени под сегашниот опсег на каматни стапки од 4,25 до 4,50 проценти.
Секој притисок врз цените од царините што ги наметна американскиот претседател Доналд Трамп треба да достигне врв до крајот на оваа или почетокот на следната година, рече тој, пренесува РТВ.