Финансии / Банкарство
ЦЕНАТА НА ЗЛАТОТО ГО ПОМИНА ПСИХОЛОШКИОТ ПРАГ
02.09.2025
Вредноста на златото во понеделник го премина психолошкиот праг од 3.500 долари за унца, достигнувајќи историски максимум. Ова се должи на очекувањата за намалување на каматните стапки во САД и растечките загрижености за геополитичките и економските ризици.
На азиските пазари, цената на златото за итна испорака накратко се зголеми за 0,9 проценти на 3.508,73 долари за унца, надминувајќи го претходниот рекорд поставен во април. Иако имаше мало повлекување во тргувањето, златото забележа раст од повеќе од 30 проценти од почетокот на годината, објави Тпортал.
Главен двигател на сегашниот пораст е сè поверојатната можност американската централна банка (ФЕД) да ги намали каматните стапки овој месец. Претседателот на ФЕД, Џером Пауел, неодамна сигнализираше отвореност за таков потег, а претстојниот извештај за вработување би можел дополнително да ги зајакне аргументите за олабавување на монетарната политика.
Покрај златото, и среброто бележи силен раст, чија цена се зголеми за повеќе од 40 проценти од почетокот на годината. Во понеделник, среброто надмина 40 долари за унца за прв пат од 2011 година. За разлика од златото, среброто има и силни индустриски примени, особено во брзорастечкиот соларен сектор, што дополнително ја зголемува побарувачката.
Според Институтот за сребро, пазарот на сребро се движи кон петтата година по ред со дефицит во понудата. Слабеењето на доларот дополнително ја зголемува куповната моќ на клучните пазари како што се Кина и Индија, додека растечките тензии на глобалната политичка сцена и во самите Соединетите Американски Држави дополнително ја зајакнуваат привлечноста на „безбедните инвестиции“ како што се скапоцените метали, пренесува Тпортал.