Финансии / Банкарство
Албанија до 2030 година да биде земја со безготовинско плаќање! – премиерот најавува дигитална револуција во Албанија
04.09.2025
Албанија подготвува план за да стане првата целосно безготовинска земја во светот до 2030 година. Имаме амбиција да ја направиме Албанија „безготовинска“ до крајот на оваа деценија, што значи дека сите интеракции и финансиски трансакции ќе бидат дигитални“, изјави албанскиот премиер Еди Рама за време на состанокот со претставници на секторот за технологија и иновации.
Главниот мотив за оваа радикална трансформација, според Селами Џепе, професор по економија на Универзитетот во Тирана, се состои во „елиминацијата на готовината“.
- Ова е апсолутен приоритет за земјите што се соочуваат со високо ниво на неформалност и дестабилизирачки количини на нелегални пари во финансискиот систем, рече Џепе.
Се проценува дека сивата економија во Албанија изнесува помеѓу 29 и 50 проценти од бруто домашниот производ.
Банкарскиот систем и општествениот контекст во Албанија сè уште не се подготвени за таков чекор. Готовината сè уште доминира во секојдневниот живот на албанските граѓани, а голем дел од населението не им верува на банките, што се докажува со фактот дека помалку од половина од Албанците имаат банкарска сметка.
Истовремено експерти за сајбер безбедност предупредуваат дека земјата во моментов не е доволно подготвена да ја заштити својата дигитална инфраструктура, што претставува сериозен ризик. Малите производители и трговци во Албанија, особено во руралните средини, не се подготвени за дигитални трансакции поради недостаток на инфраструктура и дигитална писменост, додека дополнителните трошоци за банкарски провизии го отежнуваат користењето на дигиталните системи за плаќање.
Централната банка на Албанија забележа значително зголемување на електронските плаќања во текот на изминатата деценија - од две до 21 трансакции по глава на жител годишно, но ова е сè уште далеку под просекот на Европската Унија, каде што бројката надминува 300 трансакции, пренесува Пословни дневник.