Економија
КИНЕСКИОТ ИЗВОЗ ВО САД НАМАЛЕН ЗА ТРЕТИНА, Пекинг го пренасочува извозот во ЕУ, Азија и Африка
08.09.2025
Кинескиот извоз во Соединетите Американски Држави се намали за дури 33 отсто на годишно ниво, додека вкупниот раст на извозот се забави на 4,4 отсто, што е најниско ниво во последните шест месеци, објави денеска Генералната царинска управа на Кина.
Кинескиот увоз од Соединетите Американски Држави исто така значително се намали за 16 проценти на годишно ниво, објавува CNBC.
Севкупно, кинескиот увоз порасна за 1,3 проценти на годишно ниво во август, што е далеку под очекувањата за раст од околу три проценти.
Кинеските извозници сè повеќе ги пренасочуваат стоките од Соединетите Американски Држави кон други пазари. Во август, извозот во Европската Унија се зголеми за 10,4 проценти на годишно ниво, во Здружението на земјите од Југоисточна Азија за 22,5 проценти и во Африка за речиси 26 проценти.
Трговското „примирје“ официјално потпишано од Вашингтон и Пекинг беше продолжено на 11 август за уште 90 дена, што значи дека американските царини за кинески стоки се одржуваат на околу 55 проценти, а Кина сè уште применува царини од 30 проценти за американскиот извоз, објави Блиц.