Економија
Во Дубаи се гради најголемиот соларен парк во светот
14.09.2025
Обединетите Арапски Емирати (ОАЕ) направија уште еден голем чекор во насока на енергетска транзиција. Дубаи и националната компанија за електрична енергија DEWA го развиваат соларниот парк Мохамед бин Рашид Ал Мактум, кој, кога ќе биде завршен, ќе стане најголемиот соларен парк во светот.
Овој мегапроект се гради во областа Сеих Ал-Дахал, околу 50 километри јужно од Дубаи, и се планира да достигне вкупен капацитет од 5.000 мегавати (MW) до 2030 година. Тој е клучен столб на Стратегијата за чиста енергија на Дубаи 2050, чија цел е значителен дел од енергијата во ОАЕ да доаѓа од обновливи извори, објавува Бизнис инфо.
Проектот се развива во неколку фази, користејќи комбинација од фотоволтаици (PV) и концентрирана сончева енергија (CSP).
Само во 2025 година се очекува да се додадат 800 MW нов капацитет, со што се потврдува амбицијата на ОАЕ да стане лидер во секторот за чиста енергија.
Особено важна компонента на овој парк е CSP технологијата, која овозможува складирање на сончева енергија и нејзина употреба кога нема сончева светлина. Тоа е клучен чекор кон стабилноста и сигурноста на мрежата базирана на обновливи извори.
Овој проект ги става ОАЕ на мапата на глобални лидери во зелената енергија и отвора врата за нови инвестиции во сродни сектори како што се електричните возила, паметните мрежи и технологиите за складирање на енергија, пренесува Инвеститор.ме.
Фото Економија и бизнис