Економија
ЕУ воведува високи царини за кинески челик, ќе се применуваат и правилата „Купувајте европски“
26.09.2025
Во наредните недели, Европската Унија ќе воведе заштитни царини кои се движат од 25 до 50 проценти за кинески челик и челични производи, објави весникот „Ханделсблат“, повикувајќи се на анонимен висок европски функционер во Брисел, пренесува Еуроњуз.
Овој потег е дел од поширока стратегија за враќање на конкурентската рамнотежа на европскиот пазар, кој се соочува со масовен увоз од Кина и затворање на американскиот пазар.
Покрај тоа, Европската Унија планира да ги поврзе јавните набавки, вклучително и изградбата на метроа, железници и мостови, со правилата „Купувајте европски“ кои фаворизираат употреба на европски „зелен челик“ и електрични возила.
Големите компании и синџирите за изнајмување автомобили ќе бидат обврзани дел од своите возни паркови да ги базираат на електрични автомобили произведени во Европската Унија.
Европскиот комесар за индустрија, Стефан Сејурн, нагласи дека Европа „нема друг избор освен да пронајде нова рамнотежа“ со намалување на внатрешните трговски бариери и истовремено зајакнување на надворешните мерки за заштита против трговските партнери кои, како што рече, „веќе не почитуваат никакви правила“, пренесува Еуроњуз.
Фото Економија и бизнис