Финансии / Банкарство
Приватноста главна причина за доминацијата на плаќањата во готово во некои земји од ЕУ
10.10.2025
Употребата на готовина опаѓа низ цела Европа, но повеќе од половина од сите трансакции сè уште се извршуваат со банкноти, покажува ново истражување од Европската централна банка (ЕЦБ) за 2024 година. Сепак, во однос на вредноста на плаќањето, уделот на готовината е значително помал.
Според анкета спроведена меѓу 40.000 граѓани на Еврозоната, 52% од сите трансакции минатата година биле извршени во готовина. Меѓутоа, кога се гледа вредноста на тие плаќања, тој удел паѓа на 39%.
Во дури 14 од 20 земји од Еврозоната, готовината сè уште е најчесто користено средство за плаќање, при што нејзиниот удел варира од 45% до 55% во половина од земјите. Додека во Холандија готовината се користи само во 22% од случаите, во Малта дури 67% од трансакциите сè уште се готовина.
Готовината најмногу доминира во Јужна и Источна Европа, во Италија таа учествува со 61% од сите плаќања, во Шпанија 57% и во Словенија 64%.
Спротивно на тоа, северните и западните земји: Холандија (22%), Финска (27%), Луксембург (37%), Белгија (39%) и Франција (43%), сè повеќе се префрлаат на дигитални форми на плаќање.
Меѓу четирите најголеми економии на ЕУ, Франција е единствената под просекот на Еврозоната (52%), додека Германија е малку над тоа, со удел од 53% во готово.
Кога се разгледува вредноста на трансакциите, готовината во Еврозоната учествува со 39% во вкупните плаќања, со големи разлики меѓу земјите - од 17% во Холандија до 59% во Литванија.
Земјите со најголема зависност од плаќањето во готовина (повеќе од 50% од вкупните трошоци) се Литванија, Словачка, Словенија, Австрија, Малта и Хрватска.
Од друга страна, најмалку се користи во Холандија (17%), Финска (28%), Луксембург (29%), Германија (30%), Франција (34%) и Белгија (35%).
ЕЦБ наведува дека готовината најчесто се користи за помали купувања, додека картичките доминираат за трансакции поголеми од 50 евра.
Испитаниците истакнаа дека главната предност на готовината е тоа што „ја штити приватноста и анонимноста“ (41%), додека 35% веруваат дека плаќањето со готовина им помага да бидат посвесни за своите трошоци.
Постарите граѓани почесто користат готовина, лицата над 65 години плаќаат со готовина во 57% од случаите, додека лицата под 40 години го прават тоа во помалку од половина од трансакциите, пренесува Инвеститор.ме.
Фото Економија и бизнис