Бизнис
ТОНИ СТОЈАНОВСКИ ВО „БИЗНИС-КЛУБ“: „РИЗИЦИ И ПРОБЛЕМИ СЕКОГАШ ЌЕ ИМА, НО СО ОТВОРЕН ДИЈАЛОГ ТИЕ МОЖАТ ДА СЕ МЕНАЏИРААТ И ДА СЕ ПРЕТВОРАТ ВО МОЖНОСТИ ЗА ЕФЕКТИВНОСТ, ЕФИКАСНОСТ, РАСТ И РАЗВОЈ“
01.12.2025г
„Би сакал да создадам банка која ќе биде столб на финансискиот систем на Македонија; банка партнер на сите бизниси, банка на која ќе можат да се потпрат сите домаќинства во Македонија; технолошки опремена и дигитализирана банка со примена на сите најнови технологии за добробит на нашите клиенти; банка која со своето постоење ќе има смисла не само за себе, туку и за околината во која функционира“, изјави м-р Тони Стојановски, главен извршен директор и член на УО на „НЛБ банка“ Скопје, во најновото издание на „Бизнис-клуб“ со претседателот на Комората Бранко Азески.
М-р Стојановски потсети дека за да се разбере денешниот банкарски систем, мора да се земат предвид состојбите од минатото – периодот на враќање на довербата на граѓаните во банките по банкарскиот колапс по распадот на поранешна Југославија и времето на големата инфлација, кога бизнисите се бореле за опстанок.
„Стабилноста на цените е јавно добро без кое бизнисите не можат да напредуваат“, истакна Стојановски.
Во таа насока, додаде: „Ако имаме позитивно настроен критички поглед, ќе идентификуваме многу точки каде што сме направиле напредок, што ќе нѐ растовари од некои фрустрации за да видиме што е тоа што треба да го направиме денес.“
Стојановски подвлече дека е неопходно да се почитуваме себеси, да го почитуваме сето она што е постигнато и јасно да се фокусираме на она што ни е потребно денес и во иднина – отвореноста кон нови знаења и вештини. „Светот оди напред“, нагласи тој, „а ние мора да бидеме во чекор со него“. Според него, тоа бара:
- промена на образовниот систем, кој ќе ги следи промените и иновациите;
- континуирана едукација и доживотно учење;
- прифаќање на новините (зелена агенда, циркуларна економија...).
Тој нагласи дека коморите имаат незаменлива улога во овие процеси бидејќи први ги препознаваат промените и ги поттикнуваат компаниите да бидат отворени за таквите промени.
На прашањето дали банките располагаат со индикатори за предвидување ризици и дали можат да ѝ сугерираат на државата за навремено справување со последиците, Стојановски истакна дека редовно се подготвуваат анализи и дека тие се споделуваат со институциите. „Само со отворена комуникација со сите чинители во системот може да се спречат предизвиците бидејќи сите имаме знаење и искуство кое треба да се искористи“, рече м-р Стојановски.
„Ризици и проблеми секогаш ќе има, но со отворен дијалог тие можат да се менаџираат и да се претворат во можности за ефективност, ефикасност, раст и развој“, додаде Стојановски.
Во продолжение на разговорот м-р Стојановски упати и порака до младите: професиите се менуваат, па затоа е најважно младите да научат како да учат, а фокусот да биде на доживотното учење.