Вести
ПРОГЛАСЕНИ ДОБИТНИЦИТЕ на Повелбата - Патрон на градот „Свети Климент Охридски“
04.12.2025
Националната установа „Завод и Музеј“ од Охрид, Јорданка Матова, „Силви Бенд“, Даниел Јовески и „The Backdoor Band“ се годинешните добитници на Повелбата - Патрон на градот „Свети Климент Охридски“ што ја донесува Комисијата за одбележување празници и манифестации и доделување награди и признанија при Општина Охрид.
Во образложението на одлуката на Kомисијата се посочува дека НУ „Завод и Музеј“ - Охрид во своето речиси 70-годишно постоење се етаблира како една од најзначајните, најстручни и најпосветени културни интитуции во Охрид и државата. Музејот е наследник на најстарите музејски традиии во Европа. Со својата богата дејност, институцијата континуирано придонесува за зачувување, истражување и промовирање на културното наследство на Охридскиот регион.
За Јорданка Матова се наведува дека е историчар на уметност од Охрид која со својата посветеност кон уметноста и музеологијата опстојува повеќе од три децении. Таа има богата кариера со бројни истражувања, изложби и научни публикации.
„Силви Бенд“ се музичко брачно дуо на Силви и Влатко Плевнеш кои имаат значаен придонес за музичката култура во Охрид и државата. Нивната музика, нивните песни и нивниот партиципативен дух ја надминуваат димензијата на естрадна забава. Оваа година „Силви бенд“ го прослави својот 35-годишен јубилеј.
Даниел Јовески е режисер, продуцент и музичар. Продуцира музички видеа и аудио-визуелни проекти, со што ја промовира македонската музичка сцена во регионот и пошироко. Јовески е добитник на бројни меѓународни награди и признанија.
„The Backdoor Band“ како музички состав со преку 1500 настапи, редовно учествува на фестивали, концерти, останати културни настани во нашиот град. Тие се 15 години на музичката сцена и се редовни иницијатори и организатори на бројни хуманитарни настани.
Претходно беше соопштено дека годинашната највисока општинска награда му се доделува постхумно на охридскиот новинар и публицист, Владимир Ангеличин – Жура.
Наградите и признанијата на годиншните лауреати ќе им бидат врачени на Свечената академија што по повод патрониот празник ќе се одржи на 8 Декември – денот на Свети Климент Охридски.
Извор/фото МИА