Бизнис
ЕКСКЛУЗИВНО за ЕКОНОМИЈА И БИЗНИС | Живко Мукаетов: Очекувања за 2026 година
Што очекувате од 2026г.
Економија и бизнис | печатено издание | 15 декември 2025г.
Нашите активности се максимално насочени кон развивањето на генерички лекови со додадена вредност (value added medicines)
На крајот сме на една исклучително тешка година − 2025 година беше исполнета со бројни предизвици од глобален, од регионален и од локален карактер. И покрај комплексната економска околина, очекуваме годинава да ја завршиме успешно, со целосна реализација на планираните стратешки цели. Врз основа на досега реализираните инвестиции и тековните извозни трендови, за 2026 година предвидуваме најмалку повторување на очекуваната стапка на раст од 7 %. Во нашите резултати и натаму ќе доминираат извозните пласмани со јасна диверзификација на ризиците од аспект на пазари и на портфолио. Остануваме посветени на континуирано зголемување на волумените на работењето со цел зајакнување на позициите кај нашите доставувачи и оптимална искористеност на капацитетите. Ќе продолжи да доминира фокусот кон одржување и унапредување на високиот квалитет на нашите производи како основа за долгорочно задоволство и лојалност кај потрошувачите, како и целосна усогласеност со највисоките меѓународи стандарди и регулативи во фармацевтската индустрија. Инвестициите ќе бидат насочени кон зголемување на постојните производствени капацитети, воведување нови технологии и стандарди, јакнење на човечкиот потенцијал воопшто, како и во софтверската поддршка, во дигитализациите и во најскоро време и во паметната примена на вештачката интелигенција. Во делот на иновациите, на истражувањето и на развојот, нашите активности се максимално насочени кон развивањето на генерички лекови со додадена вредност (value added medicines). Како компанија остануваме посветени на примена на EСГ-принципите како стратешки двигател за управување со ризици, за одржлив раст, за поттикнување иновации, за обезбедување долгорочна конкурентност, за градење доверба кај инвеститорите и за пристап до одржливо финансирање. Сето ова очекуваме да придонесе за континуирано подобрување на нашата конкурентност во глобалната економија со надеж дека токму следнава година ќе донесе подобрување и на глобалните безбедносни состојби, што може да придонесе за подобрувања на економскиот амбиент воопшто.