Хрватската влада достави предлог измени на Законот за странци, со кои се воведува обврска за учење и полагање испит на хрватски јазик како услов за продолжување на дозволата за престој и работа за странски работници.Тие ќе мора да го положат испитот на ниво А1.1 по една година престој во земјата.

Амандманите се усогласени со законодавството на ЕУ, вклучувајќи ја Директивата за единствена дозвола и Пактот за азил и миграција, а нивната цел е побрзо прилагодување кон потребите на пазарот на трудот, намалување на административниот товар и подобра заштита на работниците од трети земји.

Странските работници ќе можат полесно да ја менуваат својата професија кај истиот работодавач, како и да го менуваат својот работодавач по шест месеци работа, без потреба од издавање нова дозвола. Дозволениот период на невработеност за време на важењето на дозволата е исто така продолжен на три месеци, или шест ако работникот имал дозвола повеќе од две години.

Рокот за обработка на апликациите е продолжен на 90 дена. Сезонските дозволи, кои беа издавани до една година, во иднина ќе важат три години за истиот работник и работодавач, додека привремениот престој заради студирање се продолжува на три години.

Се воведуваат построги услови за работодавачите и тие нема да можат да добијат нови лиценци ако се на „црната листа“ поради неправилности, ако нивната сметка е блокирана повеќе од 30 дена или ако не ги исполнуваат пропишаните финансиски критериуми. Исто така, се зголемува задолжителниот удел на домашните работници: за позитивно мислење од CES, бројот на вработени домашни работници мора да биде најмалку 10 проценти во споредба со бројот на работници од трети земји.

Според Министерството, во првите девет месеци од 2025 година се издадени 136.194 дозволи за престој и работа, помалку од една година претходно кога имало 158.837, пренесува Бизнис.ба.

Фото Економија и бизнис