Бизнис
ПОПУСТИ ДО 60 ОТСТО ЗА ТУРИСТИЧКИТЕ АРАНЖМАНИ, отворен Саемот за туризам во Белград
19.02.2026
Во Белград започна 47-от Саем за туризам, каде што учествуваат 350 излагачи. Земја партнер на саемот е Кипар, а на посетителите им се обезбедуваат попусти до 60% на разни аранжмани.
Посетителите на овогодинешниот Саем за туризам можат да очекуваат попусти до 60 проценти, објавија организаторите. Попустите опфаќаат широк спектар на аранжмани и туристички понуди, од семејни патувања и аранжмани за градски одмори до далечни и егзотични дестинации.
Учесниците на саемот ќе понудат пакети за млади, планински одмори, спа и велнес викенди во бањи, еко и активен туризам, како и аранжмани од прва минута. Особено, ќе бидат претставени домашни и странски сместувачки капацитети, туристички региони и атракции.
Националната авиокомпанија Ер Србија ќе обезбеди попуст од 25 проценти на цената за сите посетители на саемот.
Дополнително, секој стоти клиент ќе има можност да освои бесплатен авионски билет до дестинација по свој избор, што е една од поатрактивните придобивки од овогодинешниот настан, пренесуваат медиумите во Србија.
Општина Охрид и оваа година активно учествува на Меѓународниот саем за туризам во Белград, кој се одржува под слоганот „Едно патување, илјада приказни“. Градоначалникот Кирил Пецаков информира дека општината настапува заедно со Министерство за култура и туризам, ХОТАМ и други туристички чинители, со цел промоција на културното наследство, природните убавини и гастрономската понуда на градот.
Како дел од програмата, најавена е и традиционалната „Охридска вечер“, на која ќе присуствуваат претставници од туристичкиот сектор од регионот, со цел дополнително промовирање на туристичкиот потенцијал на градот.
Фото Економија и бизнис