Финансии / Банкарство
ЧЕТИРИ РАБОТИ НА КОИ МОРА ДА РАЗМИСЛУВАТЕ КОГА КРЕИРАТЕ ДИГИТАЛНА СОДРЖИНА
Дарко Булдиоски
@darko156 | newmedia.mk
Маркетингот преку содржина добива нова димензија, оваа година вклучува многу видео, транспарентност и нова виртуелна реалност
Три месеци во 2016 година, и веќе се чувствува промена и на нашиот пазар, и можеби е тоа само до мене, не знам. Но, во секој случај изминативе месеци почесто среќавам брендови кои размислуваат и се подготвени да инвестираат во содржина. Секако зборувам за содржина која има во својата основа маркетинг цели. Во светот повеќе од три години ова е сегмент од маркетингот кој од година во година добива повеќе внимание и секако повеќе буџети.
Вложувањето и градењето стратегија за развој на содржина како бренд не носи само директен маркетинг бенефит кој тежнее да е далеку подолгоречен од класичното огласување, туку носи и промена во начинот на комуникација и на структурирање на самата компанија однатре, придонесува за поголем фокус кон повратокот на инвестиции и секако поврзување со генералните бизнис цели и вредности на компанијата.
Што можеме да очекуваме, а делумно веќе и ни се случува во овој поглед на нашиот локален пазар? Се обидов да склопам листа на трендови/совети во доменот на маркетингот преку содржина што, секако, во основа ја има дигиталната комуникација.
1 Важно ќе биде кој е автор на содржината
Со зголемениот број на различни делови од содржина креирана од брендови, неизбежно ќе биде да се размислува и за малку поквалитетно поврзување со публиката. А тоа значи градење доверба и лојалност. Личниот пристап, искуството на авторот и личниот негов авторитет се важен елемент во остварување на директно поврзување со публиката. Затоа брендовите треба да не ги кријат авторите на содржините, да се поврзуваат/соработуваат со квалитетни, докажани автори кои имаат соодветно искуство за темата, но и искуство во комуникација со публика и секако веќе постоечки социјален капитал на интернет.
2 Нови канали за дистрибуција
Во зависност од твојата целна публика ќе мора да ја адаптираш стратегијата за производство на содржина соодветно на каналот на комуникација каде што се наоѓа таа. Дури и Фејсбук денес е многу повеќе од објавување статуси. Со воведувањето на канвас т.н. „инстант артиклс“ (Canvas т.н. „instant articles”) станаа достапни и за брендовите. Сега има простор каде целосно да се интегрираат текстот, видеото и фотографиите во еден прегледен, исклучително брз на вчитување, екран во рамките на самиот сервис. Дополнително тука се сервисите како Снепчет, Вајн, Инстаграм кои комплетно ја менуваат природата на комуникација, а со тоа и ги приморуваат брендовите да размислуваат на комплетно нов начин за содржина, за интеракција и за градење квалитетно присуство. Отсекогаш сум велел дека секој канал на комуникација треба да има засебно структурирана содржина, но сега со новата чет-генерација мора да се посочи дека различно структурирана содржина не е доволна. Сега се потребни комплетно различен пристап и различна содржина.
3 Видео, видео и само видео
Не е новитет ако се каже дека видеото стана број еден содржина на интернет, но новитет е што форматот на самите видеа се менува константно. Па така, ако порано советувавме дека видеата не треба да бидат подолги од 3 до 4 минути, сега во зависност од каналот таа препорака е не повеќе од 2 минути, а најчесто се препорачува и пократки од минута. Ги спомнав новите канали претходно, Снепчет на пример е главниот виновник за сè поголемиот број на видеа снимени по вертикала. Ако порано бевме навикнати на 4:3 или 16:9 пропорции и не ни беше проблем да го вртиме телефонот хоризонтално, сега тоа веќе полека, но сигурно станува застарен формат и сè повеќе консумираме вертикални видеа. По сè изгледа и Фејсбук со својата опција за стримање во живо правел компромиси, па таму форматот на видеото е квадрат, налик на она што до неодамна беше единствена опција на Инстаграм.
Видеосодржината покрај тоа што стана прифатлива и во вертикална пропорција, стана екстремно кратка благодарение на Вајн и на Инстаграм видеата, но под влијание на Фејсбук и на Инстаграм сега мора да функционира и без звук. Автоматското вчитување на видеосодржината на овие сервиси и контекстот во кој ја консумираме неа (на мобилен, во опкружување со други луѓе) придонесе видеата да бидат подготвени да ја пренесат пораката и без да биде вклучен звукот, односно имаат текст на екран кој комплетно ја пренесува пораката и секако се доволно кратки за да го задржат вниманието.
Трендот на стримање на видео во живо предизвикан од Перископ, Јутјуб и секако Фејсбук дополнително ги притиска брендовите не само да размислуваат за содржина туку и да го спојат тоа со т.н. „риал тајм маркетинг“ („real time marketing”).
4 Виртуелна реалност
Во трендовите за 2016 година апсолутно секаде се спомнуваше виртуелната реалност. И навистина, со појавата на поевтини уреди за консумирање на овој тип содржина се покрена лавина на нови можности кои отвораат нов пат за креаторите на содржина, дистрибутерите на содржина и секако за брендовите. Појавата на прилично евтини уреди кои снимаат видеа со 360 степени ја отвора и оваа врата за креирање уникатна содржина, што значи и уникатно искуство. Ако овие уреди станат масовно користени, а така укажуваат работите на развиените пазари, добро е со време да се размислува да се освои и овој канал зашто токму оваа содржина може да понуди комплетно ново (маркетинг) искуство. Фејсбук и Јутјуб веќе овозможија објавување на вакви видеа, а прашање на време е кога и стримањето во живо ќе стане мејнстрим со оглед на тоа дека веќе има сервиси кои го нудат ова, а се слушнаа и непроверени гласови дека и Јутјуб е заинтересиран за оваа работа.
Оваа 2016 година, под влијание на стратегиите за развој на содржина, за очекување е спојување или барем поинтензивна соработка на маркетинг луѓето со оние кои работат закуп на медиумски рекламен простор, директна трансформација на стратегиите за оптимизација за пребарувачи и, секако, поголемо вклучување на одлучувачките структури во самата содржина.