Финансии / Банкарство
БЕРЗИТЕ ВО ПОРАСТ, ЈАПОНИЈА ПРЕДВОДИ ВО АЗИЈА, намалени стравувањата од рецесија во САД
16.08.2024
Јапонските акции го предводеа порастот на берзите во Азија и можат да остварат најдобар неделен раст во последните четири години. Индексот Nikkei 225 забележа раст повеќе од 3%, по зајакнувањето на тргувањето на Волстрит по објавувањето на најновите податоци со што се ублажи стравот од рецесија во САД. Јапонскиот Topix ја подобри вредноста за повеќе од два отсто. Јужнокорејскиот Kospi оствари раст од 1,75% Австралискиот S&P/ASX 200 имаше раст од 1,18%.
На Волстрит, берзанските индекси пораснаа бидејќи инфлацијата во САД постепено се намалува и и покрај високите каматни стапки, економијата изгледа подготвена да избегне рецесија. Индексот Dow Jones зајакна 1,39 отсто, на 40.563 поени, додека S&P 500 порасна за 1,61 отсто, на 5.543 поени, а индексот Nasdaq за 2,34 отсто, на 17.594 поени.
Продажбата на мало се зголеми за 1 отсто во јули, по падот од 0,2 отсто во јуни. Стравувањата од рецесија, се намалија благодарение на извештајот за намалување на новите барања за невработени. Цените на акциите вчера пораснаа и на европските берзи. Лондонски FTSE индекс зајакна 0,80 отсто, на 8.347 поени, додека франкфуртски DAX порасна за 1,66 отсто, на 18.183 поени, а париски CAC 1,23 отсто, на 7.423 поени.
фото freepic