Финансии / Банкарство
ПРОИЗВОДИТЕЛОТ НА ЧИПОВИ ЗА ВЕШТАЧКА ИНТЕЛЕГЕНЦИЈА ГИ „ДИКТИРА“ ЦЕНИТЕ НА БЕРЗИТЕ, индексите на берзите во светот во минус
29.08.2024
Цените на акциите на вчерашното берзанско тргување паднаа најмногу во технолошкиот сектор бидејќи инвеститорите беа нервозни пред објавувањето на деловниот извештај на „Нвидиа“. На Волстрит, берзанските индекси паднаа вчера и се очекува да продолжат да паѓаат и денеска бидејќи деловните резултати на најголемиот светски производител на чипови за вештачка интелигенција „Нвидиа“ (Nvidia) не се толку одлични како што се надеваа инвеститорите. Индексот Дау Џонс вчера загуби 0,39 отсто, на 41.091 поен, додека С&П 500 се лизна за 0,60 отсто, на 5.592 поени, а индексот Насдак се намали за 1,12 отсто, на 17.556 поени.
По затворањето на Волстрит, производителот на чипови објави дека во изминатиот квартал остварил приход од 30 милијарди долари, околу 120 отсто повеќе отколку во истиот период минатата година, додека неговиот профит достигна 16,6 милијарди долари, околу 10 милијарди долари повеќе од минатата година.
На азиските берзи цените на акциите паднаа. MSCI индексот на азиско-пацифичките акции, без јапонските, во истиот период од тргувањето како и во Европа беше во минус за 0,5 отсто. Истовремено, на токиската берза индексот Nikkei ослабе за 0,1 отсто, додека цените на акциите во Австралија, Шангај и Јужна Кореја паднаа меѓу 0,3 и 1,1 отсто. Во Хонгконг, пак, пораснаа за 0,3 отсто.
фото freepic