Финансии / Банкарство
ХАЛКБАНК ВО ЕКО-АКЦИЈА ЗА ПОСТИГНУВАЊЕ НА ЦЕЛТА ЗА ЗЕЛЕНА МАКЕДОНИЈА СО ЗАСАДУВАЊЕ НА МИЛИОН САДНИЦИ
18.12.2024
Засадување на 20.000 садници годинава, со зголемување на бројот на садници на 250.000 за следната година или вкупно еден милион до крајот на 2029 година, ова е најновата еко-акција на Халкбанк АД Скопје, која е насловена „Еден милион садници за пет години“, која ќе се спроведува во соработка на Министерството за земјоделство, шумарство и водостопанство и Министерството за животна средина и просторно планирање.
- Оваа иницијатива е дел од нашата поширока платформа ХалкЕко со која сакаме да ја подигнеме свеста за почист воздух за сите генерации. Восхитен сум од целта што сакаме да ја постигнеме и да ја направиме Македонија зелена. Нашите шуми се нашето наследство, но и наша одговорност. Да ја прифатиме оваа можност за промена. Да бидеме генерацијата која ќе остави трага – не само на зборови, туку и на дела, изјави Билал Суџубаши, главниот извршен директор на Халкбанк АД Скопје.
Министерот за земјоделство, шумарство и водостопанство, Цветан Трипуновски посочи дека проектот предводен од Халкбанк е пример за тоа како корпоративниот сектор може да придонесе за заштита на животната средина и унапредување на заедницата.
- Со засадувањето на нови дрвја, како дел од генералниот план за пошумување на Министерството и Владата ќе ги обновиме и заштитиме овие витални ресурси. Овие дрвја не само што ќе зголемат зелени површини, туку и ќе ја зголемат агриекономската продуктивност, ќе ја поддржат локалната економија и ќе помогнат во заштита на водните ресурси за еден одржлив развој на земјоделството, изјави Трипуновски, министер за земјоделство.
Според директорот на ЈП Национални шуми, Здравко Трајанов, акцијата на Халкбанк го покажува високиот степен на еколошка зрелост и на општествена одговорност на компанијата, а воедно изрази подготвеност за давање целосна стручна помош за квалитетно засадување на садниците во наредните пет години.
Со акцијата „Еден милион садници за пет години“ истовремено се одбележува и петгодишнината од „зелената платформа“ ХалкЕко, во рамките на која банката во изминативе години оргнизираше и поддржа бројни еколошки проекти. Преку платформата ХалкЕко досега се реализирани повеќе акции низ различни општини во кои беа засадени над 60.000 садници. Банката реализираше и низа други активности, во кои најде поддршка и од партнерот Мастеркард, за уредување на урбани корнери, реновирање на мостови во градски парк, оддржување на еко спортски трки во трчање и велосипедизам, едукации и работилници.