Финансии / Банкарство
Војновиќ: Нашиот фокус ќе остане на обезбедување вредност за клиентите
Што очекувате од 2025г.
Економија и бизнис | печатено издание | 15 декември 2024г.
“Две илјади дваесет и петта година ќе биде година обликувана од брзиот технолошки напредок, од еволуирачките потреби на клиентите и од динамичните геополитички околности. Глобалниот деловен пејзаж ќе биде под влијание на економските политики, на меѓународните трговски односи и на преминот кон обновливи извори на енергија.
Вештачката интелигенција, дигиталните алатки и иницијативите насочени кон одржливост ќе бидат уште повеќе во фокус, поттикнувајќи иновации и подобрување на корисничкото искуство на клиентите. Геополитичките случувања дополнително ќе ја зголемат важноста на внимателното управување со ризици, како и планирањето на оперативната издржливост.
Во нашиов регион, економската стабилност, дигиталната трансформација и напорите за приближување кон ЕУ ќе играат клучна улога. Со соодветно приспособени политики и со поддршка, регулаторите ќе можат да поттикнат раст и да овозможат компаниите полесно да одговорат на барањата на пазарот. Соработката меѓу регулаторите, бизнисите и заедниците ќе биде неопходна за градење конкурентна, стабилна и отпорна економија способна да одговори на локалните и на глобалните предизвици.
Две илјади дваесет и петта година година ќе биде дефинирана од иновации, од соработка и од заедничка посветеност кон справување со глобалните предизвици. Нашиот фокус ќе остане на обезбедување вредност за клиентите, истовремено поттикнувајќи одржливост и конзистентност во овој поврзан и постојано променлив свет“.