Финансии / Банкарство
АРГЕНТИНСКАТА „ШОК“ ТЕРАПИЈА ЗА НАМАЛУВАЊЕ НА ВИСОКАТА ИНФЛАЦИЈА
15.01.2025
Инфлацијата во Аргентина во 2024 година изнесуваше 117,8 отсто, што е „огромен“ пад од 94 поени во однос на претходната година.
Во декември лани на месечно ниво инфлацијата се зголемила за 2,7 отсто, објави Националниот институт за статистика (Индек). Иако, има благ пораст во однос на ноемврискиот месечен раст од 2,4 отсто, инфлацијата во Аргентина продолжува со силниот тренд на забавување што трае веќе неколку месеци.
Ова е трет последователен месец како инфлацијата е под три отсто, што е најниско ниво во последните три години во Аргентина, која е третата по големина економија во Латинска Америка. Со 117,8 отсто во текот на дванаесет месеци, аргентинската инфлација е една од највисоките во светот. Но, вртоглавиот раст на инфлацијата од 2023 година, кога достигна 211,4 отсто е речиси преполовен.
- За 12 месеци ја урнавме инфлацијата, објави министерот за економија Луис Капуто.
Владата која е формирана по победата на аргентинскиот претседател Хавиер Милеи, направи драстични „буџетски прилагодувања во историјата“. Ова е постигнато со примена на „шок терапијата“: девалвација на националната валута за 54 отсто, драстично намалување на јавната потрошувачка и кратење на државните работни места, кратење на субвенциите и на прекумерната емисија на пари.
Ефектите од ваквото буџетско штедење во Аргентина се: намалување на куповната моќ на граѓаните, повеќе од 250 илјади изгубени работни места, пад на економската активност и влегување во рецесија и на крајот зголемување на стапката на сиромаштија во земјата на 52,9 отсто во првата половина на минатата година, пренесува Н1.
фото freepic