Финансии / Банкарство
ЕВРОПСКАТА ЦЕНТРАЛНА БАНКА ПРЕД НАМАЛУВАЊЕ НА КАМАТИТЕ ВО ЈАНУАРИ!
25.01.2025
Од Европската централна банка пристигнуваат најави за продолжување на трендот на намалување на каматните стапки, а очекувањата се дека тоа би се случило на првиот состанок годинава, кога би се донела одлука за намалување на депозитната стапка за уште 25 базични поени, односно на 2, 75 отсто.
Креаторите на монетарната политика на еврозоната, пред одржувањето на годишниот самит во Давос, истакнаа дека намалувањето на каматните стапки треба да се спроведе дури и ако американската централна банка не донесе слична одлука на состанокот истата недела.
Американската ФЕД ќе донесе одлука за каматните стапки на 29 јануари, а ЕЦБ еден ден подоцна – 30 јануари.
ЕЦБ ги намали стапките четири пати во последните шест месеци како одговор на слабиот економски раст и падот на инфлацијата. Аналитичарите и берзанските инвеститори во САД и ЕУ, главно тврдат дека новото намалување е „готова работа“. Ова го очекуваат дури 77 аналитичари анкетирани во анкетата на Ројтерс.
- Нашата цел е среднорочно да ја задржиме инфлацијата на два проценти и сега сме на добар пат. ЕЦБ не е претерано загрижена за инфлациските ризици од странство и ќе продолжи да ги намалува каматните стапки со постепено темпо – пишува на официјалната веб-страница на ЕЦБ.
Одлуката на Европската централна банка за намалување на каматните стапки потенцијално може да има позитивно влијание врз потрошувачката на домаќинствата во еврозоната. Пониските каматни стапки го прават задолжувањето поевтино, што може да ги поттикне домаќинствата да земаат заеми за планирани големи расходи, како што се купување недвижен имот, автомобили или некои производи за широка потрошувачка, пренесува „Курир“.
фото freepic