Финансии / Банкарство
ЕЦБ ПОД ПРИТИСОК ЗА ЗАЖИВУВАЊЕ НА ЕКОНОМСКИОТ РАСТ НА ЕВРОПА
06.03.2025
Европската централна банка (ЕЦБ) е под притисок преку монетарни мерки да ја заживее стагнантната економска динамика во Европа, па можно е на денешниот состанок да ја намали каматната стапка за 0,25 отсто. Но не е сигурно дали ќе биде донесена ваква одлука, која беше речиси извесна до пред недела-две.
ЕЦБ планира дополнително да ги намали каматните стапки поради загриженоста за економската ситуација во еврозоната. Во исто време, американскиот претседател Доналд Трамп се закани дека ќе воведе царини од 25 отсто на увозот од ЕУ, што предизвика страв од дополнително забавување на економскиот раст.
Главната каматна стапка, таканаречената депозитна стапка, би требало да се намали на 2,5 отсто, откако веќе беше намалена за еден процентен поен во 2024 година, како и за дополнителни 0,25 отсто во јануари 2025 година, пишува „Еуроњуз“.
Одлуката за каматна стапка доаѓа во истата недела кога веќе стапија на сила американските тарифи за увезените стоки од Канада и Мексико од 25 отсто, додека Трамп одлучи да воведе дополнителни 10 отсто царини за кинески стоки, со што вкупната царина за увоз на Кина ќе достигне 20 отсто. Сите овие мерки сериозно влијаат на европската економија, со оглед на нејзината висока изложеност на глобалните пазари.
фото freepic