Финансии / Банкарство
Трамп се закани со оставка на Џером Пауел, шефот на Фед
17.04.2025
Претседателот на САД, Доналд Трамп, ја критикуваше работата на првиот човек на Федералните резерви (Фед), Џером Пауел, нарекувајќи го „вечно задоцнет и во заблуда“ и изјави дека неговата оставка треба да дојде „што е можно побрзо“.
Трамп ова го напиша денеска на една од социјалните мрежи.
- Предоцна е да се намалат каматните стапки по примерот на ЕЦБ (Европска централна банка) која тоа одамна го направи. Но сепак, Пауел треба да ги намали сега, напиша Трамп, и порача дека тој е созреан за оставка.
Во говор одржан во Економскиот клуб во Чикаго синоќа, Пауел изрази загриженост заради високите царини воведени од Трамп, предупредувајќи дека тоа можат да доведат до забавен економскиот раст и зголемена инфлација. Тој потенцираше дека ценовната стабилност и вработеноста може да бидат загрозени.
Ова не е првпат Трамп да го критикува Пауел. Неговиот мандат како претседател на Фед истекува во мај 2026 година. Оваа институција која се грижи за фискалната стабилност на САД се смета за независна и обично Белата куќа не се меша во нејзината работа.
Првиот човек на Федералните резерви на САД, Џером Пауел, изјави дека Фед ќе почека дополнителни податоци за оценка во која насока се движи економијата пред евентуални промени на каматите.
Во говор следен од економистите и аналитичарите, тој предупреди дека тарифната политика на претседателот Доналд Трамп може да доведе до отстапки од целите на централната банка на САД во однос на инфлацијата и вработеноста.
Ова беа првите коментари на Пауел откако Трамп минатата недела одложи некои од најстрогите царини. Тој ја опиша неодамнешната нестабилност на пазарите како очекувана реакција на трговските промени, а не како знак на економска криза која бара итна интервенција од страна на Фед.
- Економијата може да се соочи со предизвици доколку тарифите ги зголемат ценовните притисоци, а растот и пазарот на труд може да забават. Ова може да доведе до понатамошни отстапки од таргетираната инфлација од 2 отсто и максимална вработеност – двата основни приоритети на Фед, истакна Пауел.
Тој додаде дека „ефектите од царините се посилни отколку што укажуваа дури и најпесимистичките сценарија на Фед, а растот на економијата изгледа забавува“. - Потрошувачката е скромна, растот на увозот со цел избегнување на најавените царини може да влијае врз БДП, а економското расположение се влошува, рече Пауел.
И покрај тоа, Пауел додаде дека економијата сè уште е во добра состојба, но со зголемена неизвесност.
На овие коментари синоќа реагираа берзите на Волстрит, со пад на акциите на главните американски технолошки и индустриски индекси. Тргувањата денска започнаа и продолжија во црвено салдо.
Извор/фото МИА