Финансии / Банкарство
На штипскиот Економски факултет одбележан Денот на денарот
29.04.2025
Денарот е стабилен и во време на висока инфлација, не постои опасност од девалвација на нашата валута, изјави универзитетскиот професор Стеван Габер од Економскиот факултет при УГД Штип. По повод одбележувањето на Денот на македонскиот денари денеска на Економскиот факултет предавање пред студентите одржа директорката на УЈП, Елена Петрова.
- Фиксниот курс на денарот врзано за еврото ни овозможува долги години да водиме една монетарна стабилна политика и нормално централната банка си ја врши својата работа, за разлика од порано кога имало економски шокови, кои што влијаеле и ја теситрале токму способноста на централната банка. Овој изминат период можеме да кажеме дека тоа не се случува, што значи дека имаме една смирена ситуација и нема посебни стресови и од тој аспект можам да кажам дека денарот е стабилен и со оглед на тоа каква ни е економската состојба во државата мислам дека идеално решение во поглед на тоа каква политика треба да се води, рече Габер.
Пред студентите денеска предавање имаше директорката на Управата за Јавни приходи, Елена Петрова.
- Денес на овој настан што го организира УГД во чест на Денот на денарот имам чест и задоволство да се обратам пред студентите и секако ќе зборувам УЈП за историјатот и создавањето на УЈП. Историскиот развој на УЈП значи воедно и развој и трансформација на перцепцијата што ја имаат даночните обврзници за УЈП и ако во минатото пред некои 30 тина година УЈП беше перцепирана од даночните обврзници дека врши контрола и сее страв, денеска современата УЈП е препознаета како сервис на фирмите и граѓаните за поддршка, помош и информирање со цел да имаме навремено плаќање на даноците, рече Петрова.
Извор/фото МИА