Централните банки во светот продолжуваат со стратегијата за купување на повеќе злато за подобрување на своите резерви, додека во наредните пет години се очекува намалување на учеството на американскиот долар, покажува новото истражување меѓу глобалните монетарни власти.
Поради геополитичките ризици и најавените санкции од САД се повеќе растат „сомнежите“ за доминацијата на американскиот долар и ги наведоа централните банки да купуваат златни резерви со рекордно темпо. Златото неодамна го престигна еврото и стана втор најголем резервен имот во светот, веднаш зад доларот, објави Фајненшл тајмс.
Цената на златото се зголеми за 30 проценти од јануари, а се дуплираше во последните две години, благодарение на растечката глобална неизвесност и нестабилност на пазарот, што го поттикна барањето на инвеститорите за безбедно засолниште.
Според анкетата на Светскиот совет за злато, рекордни 95 проценти од испитаниците веруваат дека централните банки ќе ги зголемат своите златни резерви во следната година, а ова е највисоко ниво откако анкетата беше започната во 2018 година.
Во исто време, дури три четвртини од учесниците во анкетата во која учествуваа повеќе од 70 централни банки, очекуваат централните банки да го намалат уделот на доларите во резервите во текот на следните пет години.
Поради растечките геополитички тензии, некои централни банки планираат да преместат дел од своите резерви на злато од странство (од Лондон и Њујорк) во домашните трезори, објавува Investor me. Загриженоста за можноста за пристап до резервите на злато во случај на криза или конфискација поради санкции придонесе за оваа тенденција. Иако сè уште скромен, трендот на враќање на златото во матичните земји е сè поприсутен.
Така, минатата година Индија врати повеќе од 100 тони злато од Банката на Англија, додека Централната банка на Нигерија повлече дел од своите резерви од странство. Околу седум проценти од испитаниците објавија планови за зголемување на домашното складирање, што е највисоко ниво од почетокот на пандемијата на коронавирусот.
Сепак, чувањето на златните резреви има и свои недостатоци, вклучувајќи високи трошоци за складирање и логистички предизвици во транспортот, што го прави управувањето со него посложено во споредба со другите резервни средства, пишува Бизнис.ба.
фото freepic