Општество
Словенечки стручњак протетичар ќе им помага на повредените во Кочани, советувањето со странските експерти продолжува
23.06.2025г
Водечкиот стручњак протетичар во регионот за протези за раце и за лице (епитези), со над 25 годишно искуство Шпела Керин е во работна посета на земјава за да ја процени состојбата на повредените од трагедијата во Кочани. Во Македонија веќе има петмина корисници на нејзините протези.
На средбата со Клековски, како што соопшти ФЗОМ, е разговарано за потребите на повредените и кои се можностите. Естетско-функционалните протези се наменети за специфични потреби, се прават скроени по мерки откако ќе заврши процесот на заздравување на кожата. Разговарано е за финансирање од страна на Фондот, за што постојат искуства од Словенија и Хрватска.
Клековски, претходно комуникацил и со изралелската амбасадорка Симона Франкел, здравствените власти, како и докторите кои ги водеа тимовите од Израел за помош на повредените од Кочани, д-р Шахар Шапира од Шиба медицински центар и д-р Омер Марин, директор на „Шер Зедек“ во Ерусалим.
Тој испратил пораки за мир и безбедност, и како што посочуваат од ФЗОМ, тимовите од Израел што помогнаа по трагедијата во Кочани се безбедни, но моментално се ангажирани во третман на повредените од ракетните напади.
- Тие упатуваат поздрави до повредените во Кочани и се посветени дека ќе дојдат да помогнат веднаш штом состојбата се стабилизира. Нивната помош за Кочани никогаш нема да ја заборавиме! Продолжуваме со соработката со експерти за да обезбедиме најдобра здравствена заштита за повредените! #Здравство #Кочани #Солидарност #Поддршка, стои во соопштението од ФЗОМ.
Фото: ФЗОМ