Финансии / Банкарство
ПОНИСКИТЕ КАМАТИ ЈА ЗАСИЛИЈА ПОБАРУВАЧКАТА ЗА КРЕДИТИ ОД КОРПОРАЦИИТЕ ВО ЕВРОЗОНАТА
24.07.2025
Побарувачката за кредити од корпорациите во еврозоната малку се опорави во вториот квартал од 2025 година, а банките во регионот очекуваат трендот дополнително да се зајакне во текот на летните месеци, според најновото истражување на 155 големи комерцијални заемодаватели од страна на Европската централна банка (ЕЦБ).
Според истражувањето, банките забележаа мало нето зголемување на побарувачката за кредити во периодот април-јуни и покрај глобалната неизвесност и зголемените трговски тензии, кои продолжуваат да влијаат врз деловното опкружување.
ЕЦБ соопшти дека пониските каматни стапки биле главен двигател на растот на побарувачката за кредити во првата половина од 2025 година, но дека имало „влијанија од глобалната неизвесност и трговските конфликти“ што го ограничиле побрзото проширување на кредитното задолжување.
Во првиот квартал, побарувачката за кредити од корпорации малку ослабе за прв пат по речиси една година, што го одразува перцепираното забавување на економскиот раст во еврозоната, кое исто така беше под влијание на геополитичките ризици. И покрај ова, повеќето банки предвидуваат дека побарувачката за кредити повторно малку ќе се зголеми во периодот од јули до септември, потврдувајќи одреден оптимизам во деловниот сектор.
Кредитните услови во текот на вториот квартал останаа речиси непроменети во споредба со почетокот на годината, што значи дека заемодавателите засега немаат намера значително да ги олеснат или заострат критериумите за одобрување кредити, пренесува Пословни дневник.
фото freepic