Финансии / Банкарство
Стопанска банка со висока профитабилност во првото полугодие од 2025 година
30.07.2025
Стопанска банка - АД Скопје во првото полугодие од 2025 година продолжи со остварување солидни резултати и висока профитабилност. Добивката на Банката пред оданочување во анализираниот период изнесува 2.022.904 илјади денари, што е за 2 % повеќе споредено со истиот период од претходната година. Задржувајќи го високопрудентниот пристап во однос на управувањето со квалитетот на кредитното портфолио, во истиот период Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 555.830 илјади денари, помала за 27 % во однос на минатата година, пред сè како резултат на квалитетот на кредитното портфолио и помалата потреба за резервации, успешното раководење на бизнис-линиите во рамките на утврдената рамка на прифатлив апетит за ризик.
Согласно примената на регулативата за глобален данок кој ја засега, Стопанска банка пресметува данок со примена на ефективната даночна стапка од 15 %, кој претставува зголемување од 42 % во однос на истата категорија од минатата година и соодветно се одразува на намалување на добивката по оданочување, пишува во Анализа на неконсолидирани и неревидирани финансиски резултати на Стопанска банка АД – Скопје за период 01.01.2025 – 30.06.2025 година.
Заработката по акција изнесува 99,73 денари по пресметката на глобалниот данок.
Биланс на успех
Нето-приходите од камати изнесуваат 2.908.376 илјади денари и се намалени за 6 % во однос на истиот период од минатата година како резултат на намалените каматни стапки, но се поголеми од буџетираните за 1 %.
Нето-приходите од провизии и надоместоци изнесуваат 399.637 илјади денари и се намалени за 7 % во однос на анализираниот период во 2024 година, како резултат на зголемените расходи од провизии кои ги наплатуваат добавувачите на соодветните сервиси и истовремено намалување на провизиите кај одредени сервиси во интерес на клиентите.
Нето-приходите од курсни разлики изнесуваат 102.145 илјади денари и се зголемени за 30 % во однос на анализираниот период од минатата година како резултат на зголемениот обем на активности.
Останатите приходи од дејноста изнесуваат 471.802 илјади денари.
Одржувањето на квалитетот на кредитното портфолио и управувањето со кредитниот ризик се во приоритетните цели на Банката. Според тоа, на крајот на првото полугодие од 2025 година, Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 555.830 илјади денари.
Како резултат на сето наведено, остварената добивка пред оданочување и резервации изнесува 2.578.734 илјади денари, додека добивката пред оданочување на 30.06.2025 година изнесува 2.022.904 илјади денари и е за 2 % повисока во однос на истиот период од минатата година.
Биланс на состојба
Вкупната актива на Банката во анализираниот период изнесува 150.453.024 илјади денари, односно е повисока во однос на минатата година за 4 % или 6.441.525 илјади денари.
Паричните средства и парични еквиваленти споредени со крајот на 2024 година се повисоки за 3.310.389 илјади денари, односно за 14 %.
Кредитите на и побарувања од други комитенти нето изнесуваат 101.179.234 илјади денари и се поголеми за 2 %, односно за 2.304.691 илјади денари споредено со минатата година.
Кредитите на и побарувањата од банки изнесуваат 369.800 илјади денари и бележат намалување од 9 % споредено со крајот на минатата година.
Вложувањата во хартии од вредност изнесуваат 16.611.480 илјади денари и се приближно на исто ниво со крајот на минатата година.
Вкупните депозити на други комитенти изнесуваат 113.561.782 илјади денари.
Капиталот и резервите изнесуваат 27.001.032 илјади денари, што претставува намалување од 8 % во однос на крајот на 2024 година. На последното годишно Собрание на акционери се донесе одлука за исплата на дивиденда на обичните акции во бруто-износ од 3.998.444 илјади денари, односно 229 денари по акција. Исплатата на дивидендата се реализира во текот на јули 2025 година. Собранието истовремено донесе одлука за капитализирање на дел од добивката во износ од 3.670.382 илјади денари и зголемување на сопствените средства, со што стапката на капитална адекватност во јуни изнесува 20,54 %.
Банката и понатаму е посветена да остварува добивка која ќе биде генератор на капиталот, кој се очекува да се зголемува и покрај порастот на активностите и како резултат на регулаторните барања поставени од страна на Централната банка.
Обврските по кредити изнесуваат 2.350.023 илјади денари и во однос на крајот на 2024 година се намалени за 4 %.
Очекувања за претстојниот период
Најновите прогнози за светската економија за периодот 2025–2026 се ревидирани надолу во споредба со претходните проценки, што укажува на посилно забавување на економскиот раст оваа година. Ризиците за растот се зголемени, додека за главни причинители се наведуваат засилениот протекционизам и зголемената неизвесност во трговските политики. Се предвидува дека побавното надолно приспособување на инфлацијата од очекувањата ќе има неповолно влијание врз финансиските услови, со што се зголемуваат ризиците поврзани со фискалната и финансиската одржливост. Од друга страна, евентуалното намалување на трговските препреки, спроведувањето на регулаторните реформи со коишто би се намалил финансискиот товар на фирмите и на домаќинствата, разрешувањето на воените конфликти и посилното намалување на цената на нафтата се фактори коишто може да придонесат за повисок светски раст.
Најновите показатели од домашната економија упатуваат на макроекономска слика којашто е согласно очекувањата од априлските проекции. Меѓународниот монетарен фонд предвидува поинтензивен економски раст во услови на зголемена неизвесност. Се предвидува закрепнување на домашната економија и зајакнување на растот од 3,3 % во 2025 година, поттикнат од поголемата домашна побарувачка и од планираните јавни инвестиции, особено од интензивирањето на изградбата на автопатските делници од коридорите 8 и 10-д. Влијанието на слабата надворешна побарувачка што се забележа во 2024 година се очекува да трае и во 2025 година, предизвикано од структурните промени во европскиот автомобилски сектор. Во услови на високо ниво на буџетски дефицит и јавен долг, фокусот во иднина се препорачува да биде ставен на спроведување кредибилна фискална стратегија за враќање на усогласеноста со фискалните правила - клучна за зачувување на кредибилитетот за одржување пристап до меѓународните капитални пазари, за создавање простор за инвестиции и за зајакнување на отпорноста на идни шокови. Од аспект на монетарната политика, препораките од ММФ се задржување на каматните стапки на исто ниво и затегнување преку ликвидносните алатки сè додека инфлацијата не се стабилизира и не се намали до посакуваното ниво. Фокусот треба да биде ставен на будно следење на инфлаторните ризици од домашни фактори, вклучително и зголемување на платите и пензиите, како и зголемените надворешни ризици од трговските неизвесности.
Финансискиот систем останува отпорен, стабилен и ликвиден, со ниски нефункционални кредити на ниво на целиот систем.
Исплатени дивиденди
Во анализираниот период Банката исплати дивиденда на имателите на приоритетни акции во вкупен износ од 1.364.664,00 денари, или бруто-износ од 6 денари по акција, која се реализираше во текот на јуни 2025 година. Право на дивиденда остварија сите акционери што се стекнале со приоритетни акции до 16.06.2025 година (датум на пресек во акционерската книга), односно последен ден на тргување со право на дивиденда беше 12.06.2025 година, информираат од Стопанска банка.