Финансии / Банкарство
ФЕД ПОВТОРНО ПРОТИВ ТРАМП, НЕМА ПРОМЕНИ НА КАМАТНИТЕ СТАПКИ
31.07.2025
Од американските Федерални резерви објавија дека ги задржале постојните каматни стапки по петти пат по ред, и покрај интензивниот притисок од претседателот Доналд Трамп и неговите сојузници за намалување на трошоците за позајмување.
Централната банка ја остави референтната каматна стапка во опсег од 4,25 до 4,5 проценти, што е исто од декември минатата година, објавува CNN.
Членовите на Федерални резерви во средата беа поделени во гласањето за да ја одржат референтната каматна стапка стабилна, и покрај бранот критики од претседателот Доналд Трамп и несогласувањата меѓу двајца високи функционери.
Федералниот комитет за отворен пазар, групата што ја одредува стапката за задолжување преку ноќ, гласаше со 9-2 за да ја остави непроменета.
Одлуката наиде на противење од гувернерите Мишел Боуман и Кристофер Волер, кои инсистираа Федералните резерви да почнат да ги намалуваат каматните стапки, признавајќи дека инфлацијата е под контрола и дека пазарот на трудот наскоро може да почне да ослабува. Ова е прв пат од крајот на 1993 година повеќе гувернери да не гласаат за одлука за каматната стапка.
Соопштението по состанокот понуди само неколку промени во начинот на кој одборот ги гледа економските услови.
„Иако флуктуациите во нето извозот продолжуваат да влијаат на податоците, неодамнешните индикатори сугерираат дека растот на економската активност се ублажи во првата половина од годината“, се вели восоопштението на ФЕД.
„Стапката на невработеност останува ниска, а условите на пазарот на трудот остануваат солидни. Инфлацијата останува донекаде висока.“
Лидерите на ФЕД сакаат да почекаат уште малку за дополнителни податоци за да видат како американската економија ќе се справи со трговската војна на Трамп, и покрај тоа што се соочува со постојани напади од Белата куќа поради нејзината стратегија „почекај и види“.
Денешната одлука не беше едногласна и за прв пат од 1993 година, повеќе од еден гувернер беше против одлуката. Претседателот на Федералните резерви, Џером Пауел, на прес-конференција изјави дека се убедени дека американската економија е доволно силна за да издржи стабилни стапки, бидејќи останува да се види како царините на крајот ќе влијаат на цените и како ќе влијаат врз економијата.
„Повисоките царини почнаа појасно да влијаат врз цените на некои стоки, но нивните целокупни ефекти врз економската активност и инфлацијата сè уште не се видливи. Разумно е да се претпостави дека ефектите врз инфлацијата би можеле да бидат краткорочни, одразувајќи еднократна промена на нивото на цените, но не е невозможно инфлаторните ефекти да бидат потрајни, а тоа е ризик што треба да се процени“, рече Пауел на прес-конференцијата.
Пауел истакна дека, без оглед на фактот дека царинската политика на Трамп добива појасни контури, сè уште треба да се разбере многу за нивните конечни ефекти, вклучително и дали тие ќе предизвикаат трајна инфлација.
„Нивото на царинските давачки не се менува премногу во моментов, но сè уште има многу, многу неизвесности што треба да се решат“, рече Пауел, пренесува Данас.
фото freepic