Финансии / Банкарство
ЕМОЦИЈАТА Е ПОВТОРНО ВО МОДА
Мирослав Саздовски
Како и секој јуни, така и овојпат, Палатата за фестивали и зa конгреси во Кан, Франција, една недела беше најважното сврталиште за големите маркетинг директори, сопственици на маркетинг и ПР агенции, креативни директори и воопшто најважните претставници на комуникациската индустрија од целиот свет. Cannes Lions е, секако, најпрестижниот настан за креативноста во маркетингот, а лавчињата претставуваат сон за секој комуникациски креативец. Најдоброто од индустријата повторно се покажа со целиот свој инвентивен и креативен раскош, а речиси сите аналитичари се согласуваат дека емоцијата е повторно вратена во мода. „Оваа година се враќаме во иднината“ – изјави Ален Адамсон oд ФОРБС во своите репортажи и анализи за фестивалот. „Емоцијата отсекогаш била важен сегмент на маркетингот, но овојпат чувството е дека се враќаме на територија на која порано сме биле“ – додава тој.
Кампањата „Like a girl“, која за брендот „Always“ на „Procter&Gamble“ ја изработи агенцијата „Leo Burnett“, иако не ја освои гран-при наградата, за многумина се смета за најефективната кампања за 2015 година. Кампањата претставува бунт против стереотипите за „женски начин“ на правење на работите, употребувајќи ја емоцијата за еднаквост како носечки елемент на кампањата. Покрај неколкуте награди во разни категории, во главната категорија „Интегриран маркетинг“, заедно со уште неколку други кампањи, „Like a girl“ го освои Титаниумскиот лав. Оваа награда, покрај гран-при наградата, претставува највисоко признание од фестивалот. Меѓу другите добитници на Титаниумскиот лав се најдоа неколку интересни кампањи како онаа на „M&C SAATCHI“ за Австралискиот телекомуникациски провајдер „Optimus“, во чија суштина се наоѓа системот за рано предупредување од опасност од ајкули поставен околу цела Австралија. Истата кампања се закити и со Златен лав во делот за иновации, во конкуренција со голем број иновативни кампањи, што претставува новитет на Cannes Lions (оваа групација „иновации“ е воведена минатата година). Од аспект на иновациите, голем интерес побуди и кампањата на „Leo Burnett“, изготвена за „Samsung“, што претставува воведување на огромни телевизиски монитори на задниот дел од долгите камиони, кои поврзани со камера на предниот дел им даваат прецизна слика на останатите возачи дали можат безбедно да ги престигнуваат долгите камиони. Сепак како најуспешен комуникациски проект и најголемо признание за една агенција јас лично го сметам проектот „Abla Fahita“ на „J. Walter Thompson“ од Каиро, што за потребите на „Vodafone“ беше креиран нов куклен карактер, што набргу стекна далеку поголема популарност од кампањата за која беше замислен. Задржувајќи ги правата, агенцијата подоцна дополнително изврши промоција на „Abla Fahita“, што стана омилен карактер на широката јавност и платформа за далеку поголема комуникациска активност од првично замислената. „Abla Fahita“ преку хумор, сатира, критика, но и исмевање ги коментира најинтересните состојби во Египет и стана толку многу популарен (сличен на Мапет шоу), што претставува самостоен извор за промовирање и за рекламирање на голем број брендови.
Дека онлајн комуникацијата, особено промоцијата преку социјалните мрежи, станува доминантен фактор при креирањето на маркетинг кампањите покажува и гран-при наградата за интегриран маркетинг која отиде во рацете на „CP+B“. Тие за потребите на „Dominos pizza“ осмислија кампања за онлајн нарачки на пица преку употреба на „Emoji signs“, поточно знакот за пица преку Твитер. Кампањата мина толку многу успешно меѓу младите, што подоцна генерираше дополнителна содржина преку масовното известување за овој нов феномен на традиционалните медиуми. Сепак официјално најголем победник е високоемотивната кампања „RES2ECT“ на „WIEDEN+KENNEDY“ што за клиентот „Nike“, поточно за разгранокот „Jordan brend“, направија голема кампања за признание кон делото на бејзбол играчот Дерек Џитер, кој претставува икона на бејзболот во Америка.
Иако категоријата ПР постои веќе седум години на Cannes Lions, оваа година за првпат специјализираните агенции за ПР доминираа по бројот на освоени награди во сите категории. Тоа само покажува дека фокусот на комуникациските алатки дефинитивно се сели од адвертајзингот во ПР. Во оваа категорија секогаш се наоѓаат најинтересните и најинвентивните кампањи меѓу кои се најде и нашата кампања „Црвен телефон“ на Телевизија „Телма“, изработена од „New Moment New Ideas“ од Скопје, која освои Сребрен лав. Во оваа категорија гран-при наградата отиде во рацете на „Leo Burnett“ за „Like a girl“, а меѓу наградените кампањи имаше и некои кои ѝ се познати и на нашата јавност како „Ice Bucket challenge“ (со истурањето кофи вода на глава) која освои Златен лав.
Покрај емоцијата, Cannes Lions покажа дека комуникациската индустрија сѐ повеќе станува интегриран систем на промоција каде што ПР, иновативноста и содржината стануваат доминантен фактор за успешност. Онлајн алатките веќе не претставуваат само придружен елемент на кампањите, туку напротив, нејзин составен, а неретко и клучен сегмент при креирањето на самите кампањи. Cannes Lions покажа дека иако класичните елементи како емоцијата, хуморот, продукцијата се тука засекогаш да го детерминираат успехот на една кампања, новите ветришта како иновативноста, интегрираноста, онлајн комуникацијата сѐ повеќе го преземаат приматот при комуникацијата.