Финансии / Банкарство
Граѓаните во еврозоната бараат повеќе потрошувачки и станбени кредити
16.07.2024
Побарувачката за потрошувачки и за станбени кредити во еврозоната расте за прв пат од 2022 година. Наспроти ова, побарувачката за кредити од компаниите во периодот од април до јуни годинава и натаму се намалува, објави денеска Европската централна банка.
Во Извештајот за вториот квартал од 2024 година од ЕЦБ се нотира дека во земјите од еврозоната има значителни разлики во побарувачката за кредити од компаниите. Во Германија и Шпанија има зголемен интерес за кредити од фирмите, додека во Франција и Италија се забалежува пад, пренесува „Блумберг“.
- Повисоките каматни стапки и ниските фиксни инвестиции влијаат на фирмите и на побарувачката за кредити. Подобрувањето на состојбата на пазарот за недвижности и растот на довербата кај потрошувачите ја поттикна побарувачката за позјамици кај домаќинствата, се наведува во извештајот на ЕЦБ.
Податоците за кредитите се клучните фактори за креаторите на монетарната политика во Европската централна банка, која во четврток треба да донесе одлука за евентуално намалување на референтната каматна стапка во еврозоната.
Европската централна банка во јуни ги намали каматната стапка за главните операции на 4,25 отсто, каматната стапка на депозитите на 3,75 отсто и маргиналната каматна стапка на 4,50 отсто, во сите три случаи за 25 базични поени. Експертите не очекуваат дека ќе дојде до ново намалување на каматите пред септември годинава.
Еврозоната во мај, според првите прелиминарни проценки, забележа суфицит од 13,9 милијарди евра во стоковната трговија со остатокот од светот, објави денеска Евростат.
Вредноста на извозот на стоки од еврозоната во остатокот од светот во мај 2024 година изнесува 241,5 милијарди евра, што претставува намалување од 0,5 отсто на годишно ниво, додека увозот во исто време е намален за 6,4 отсто на годишно ниво до 227,6 милијарди евра.
фото freepic