Финансии / Банкарство
НБХ со предупредување до хрватските банки: граѓаните пребрзо се задолжуваат со потрошувачки кредити
21.07.2024
Советот на Народната банка на Хрватска ги предупреди банките дека потрошувачките ненаменски готовински кредити за граѓаните растат побрзо, а тоа претставува потенцијален ризик за стабилноста на банкарскиот сектор. Износот на готовинските кредити за хрватските граѓани достигна над осум милијарди евра и ако продолжат со истотот темпо на раст ќе достигнат 20 отсто.
- Сега имате стапка на учество на готовински кредити од 14 отсто. Ова е ниво кое досега го немавме. Кредитите се одобруваат под релативно лесни услови. Заеми добиваат и лица кои не можат редовно да ги отплатуваат. Вработените во јавните служби добија поголеми плати за 100, 200 или 300 евра но одлучиле да позајмат од банките кредити во вредност од десет илјади евра, изјави Ведран Шашиќ, главен економист во ХНБ.
Ненаменските потрошувачки кредити по својата природа се поризични од станбените кредити, за кои стапката на ненаплатливи кредити е околу два до три отсто. Кај кредитите во готово оваа стапка изнесува шест отсто. Од Народната банка на Хрватска препорачуваат банките да бидат повнимателни, затоа што оптимизмот на граѓаните што се јави со повисоките приходи нема да продолжи, затоа што платите нема да растат како во последните години. Очекувањата се дека инфлацијата ќе се намали, а растот на номиналните приходи на граѓаните од кои се плаќаат кредитите нема да можат да растат со иста брзина.
Најголем раст на кредитите има за износот над 30.000 евра, но најголемиот дел од потрошувачките кредити за граѓаните се во износ до 10.000 евра, пренесува ХТВ.
фото freepic