Финансии / Банкарство
Банката на Канада повторно ја намали клучната каматна стапка
25.07.2024
Банката на Канада ја намали клучната каматна стапка на 4,5 отсто. Економистите очекуваа намалување на каматната стапка по намалувањето на инфлацијата во јуни. Ова е второ последователно намалување на каматната стапка по состанокот минатиот месец, кога каматната стапка беше намалена за прв пат од март 2020 година, пренесува ЦБС.
По состанокот во јуни годинава, Банката на Канада ја намали клучната каматна стапка за 25 базични поени на 4,75 отсто. Претходно, стапката беше одржувана на пет отсто од јули 2023 година. Банката започна долг и агресивен циклус на зголемување на каматните стапки во април 2022 година, за да ја заузда високата инфлација.
Гувернерот Тиф Меклем вчера пред новинарите изјави дека е разумно да се очекува натамошно намалување на каматните стапки доколку продолжи да се намалува инфлацијата.
Аналитичарите наведуваат дека одлуката за ново намалување на каматните стапки не претставува изненадување , затоа што инфлацијата продолжува да се намалува. Банката на Канада својата следна одлука за каматните стапки ќе ја донесе на 4 септември годинава, пренесува „Бизнис.рс“.
фото freepic