Финансии / Банкарство
ЕЦБ: Домаќинствата во еврозоната избегнуваат нови задолжувања кај банките
26.07.2024
Домаќинствата во еврозоната избегнуваат да се задолжуваат кај банките, а позајмиците во јуни се зголемени само за 0,3 отсто на меѓугодишно ниво, се заклучува во најновиот извештај на Европската централна банка.
Вкупната вредност на кредитите за компаниите се зголемени за 0,7 отсто и има мало „забрзување“ од месец мај кога бележеа раст од 0,3 отсто. Вредноста на монетарниот агрегат М3 на вкупните ликвидни средства во еврозоната во јуни се зголемила за 2,2 отсто меѓугодишно, а вредноста на монетарниот агрегат М1, кој го содржи парите во оптек и прекуноќните депозити, се намали за 3,4 отсто во споредба со истиот период лани.
Податoците за висината на кредитите се клучни за креаторите на монетарната политика на Европската централна банка, која треба да одлучи за евентуалното намалување на референтната каматна стапка во еврозоната. ЕЦБ во јули ја задржа каматната стапка на главните операции на 4,25 отсто, каматната стапка на депозитите на 3,75 отсто и маргиналната каматна стапка на 4,5 отсто.
Следниот состанок на ЕЦБ на кој би се разгледувала можноста за корекција на каматните стапки ќе биде одржан во септември, пренесува „Политика“.
фото freepic