Финансии / Банкарство
Осигурителните компании во САД со најголеми загуби поради честите поплави и пожари
29.07.2024
Американските осигурителни компании во 2023 година претрпеа најголеми загуби во работењето во последните децении, поради комбинацијата на неколку фактори: природните катастрофи, инфлацијата и зголемувањето на населението во ризичните региони на САД, објави агенцијата АМ Бест, која е специјализирана за промет за недвижности.
Компаниите кои издаваат полиси за сопствениците на куќи забележале нето загуба од 15,2 милијарди долари во минатата година. Овој износ претставува најголема загуба од 2000 година и за двапати повисок од претходната година, пренесува „Ројтерс“.
Во анализата за работењето на осигурителните компании во САД се наведува дека растечката популација во подрачјата кои се најподложни на природни катастрофи е клучен фактор за негативните финансиски резултати. Имено, во шест држави кои се изложени на тешки временски услови, во кои се Калифорнија, Тексас и Вашингтон, е остварен половината од растот на бројот на населението во минатата деценија.
- Зголемениот број на жители значи и зголемен број на недвижности, а со тоа и на вредноста за осигурување. Изградбата на домови во подрачјата кои се изложени на поплави го зголемува и ризикот. Исто така, зголемен е ризикот и од пожари во другите подрачја на САД, се наведува во извештајот на АМ Бест, пренесува „Бизнис.рс“.
фото freepic