Финансии / Банкарство
Нова даночна стратегија во Црна Гора: зголемување на ДДВ за книгите, билетите за театар, музеи, кино...
30.07.2024
Со новата фискална стратегија на Црна Гора се предвидува зголемување на стапката на ДДВ од седум на 15 отсто за издавање на книгите и на дневните и периодичните печатени изданија. Со зголемувањето на данокот цените на книгите ќе се зголемат за осум отсто, пренесува „Мина“.
Во повеќето европски држави во Европската Унија издавањето на книги и на печатените медиуми се смета за јавен интерес поради образовниот и културниот развој на нацијата и информирање на граѓаните и се применуваат повеќе мерки за стимулирање на оваа дејност или со пропишување на ниски или нула стапки на ДДВ.
Во Црна Гора се применуваат три стапки на ДДВ од нула, седум и 21 отсто, но со новиот фискален документ се воведува средна стапка од 15 отсто. Во нацрт стратегијата на Владата на ЦГ се наведува дека од зголемувањето на ДДВ од седум на 15 отсто се очекува годишен приход од вкупно 60 милиони евра. Нема податоци за очекуваниот прилив од повисокиот данок за книги и за дневните и печатени изданија.
Во образложението на владата се наведува дека воведувањето на средна стапка на ДДВ е со цел за „компензирање на намалените приходи на државата по основ на намалување на даночните оптоварувања на платите со што Црна Гора станува еден од најповолните даночни системи во делот на оданочување на трошоците на трудот“.
Во истиот документ владата планира да се намалат придонесите на пензиско осигурување од сегашните 20,5 отсто од бруто платите на десет отсто, со што платата на вработените во просек ќе се зголеми за околу пет отсто, а работодавачите би имале намалување на давачките за 5,5 отсто. Со ова намалување ќе се остварат помалку приходи во буџетот за 180 милиони евра, па затоа се проширува даночната основа и за други производи. Во нацрт стратегијата се предлага зголемување на стапката на ДДВ од седум на 15 отсто и за монографиите и периодичните публикации, за авторските права и услуги од образованието, за книжевноста и уметноста, за науката и уметничките предмети, за влезници во кино и театарски претстави, концерти, музеи, саеми, натпревари...
Од 21 на 15 отсто се намалува ДДВ за соларни панели и фризерски услуги, за сите услуги во сместувањето и угостителските услуги, освен за алкохолните пијалоци, газирани и негазирани сокови и кафе, пренесува „Бизнис.рс“.
фото freepic