Финансии / Банкарство
Паниката по црниот понеделник на берзите помина, но продолжува „коктелот“ од неповолни фактори
07.08.2024
Европските и американските берзански индекси и денеска се во пораст по смирувањето на пазарите на хартии од вредност, по понеделничкиот пад на берзите во светот. Берзите реагираа пречуствително поради стравот дека американската централна банка ФЕД задоцнила со намалување на каматните стапки и дека не успеала да го спречи забавувањето на економијата на САД, пренесува Си Ен Би Си (ЦНБС).
Индексот на франкфуртската берза DAX утрово порасна на 17.424,65 поени, британскиот FTSE 100 на 8.083,49 поени, францускиот CAC 40 на 7.170,61 поени, московскиот MOEX на 2.841,52 поени.
Денеска индексите продолжија да растат и на азиските пазари, предводени од силниот раст на токискиот Nikkie, откако централната банка на Јапонија (BoJ) неочекувано ја сигнализираше својата неподготвеност да ги зголеми каматните стапки дополнително, со што јенот остро се намали.
Индексот MSCI на азиско-пацифичките акции порасна за 1,32 отсто. Јапонскиот индекс Nikkei порасна за 2,7 отсто, откако вчера се зголеми за повеќе од 10 отсто, што доведе до оптимизам дека инвеститорите најдоа основа на пазарот по острата корекција. За споредба, во понеделникот Nikkei потона речиси 13 отсто.
Причината за крахот на берзите на почетокот на неделата беше поради стравот на инвеститорите од можната рецесија во САД.
- По понеделничката паника состојбите се смируваат, изјави Јохен Штанци, аналитичар на брокерската куќа ЦМЦ Маркетс, пренесува „Дојче веле“.
Германските банкарски аналитичари наведуваат повеќе причини за падот на вредноста на акциите. Еден од главните „мотори“ на негативниот тренд е стравот од рецесија во САД, а инвестоторите стравуваат од можноста дека состојбата на американската економија е полоша од таа што се прикажува. Во јули најмоќната економија во светот креираше помалку нови работни места од очекуваниот број. Инвеститорите не ги смири ни најновата одлука на Американската централна банка ФЕД од средината на минатата недела и најавата за можно смалување на референтната каматна стапка во септември годинава. Предвидувањата на финансиските консултантски куќи се дека ФЕД во септември, ноември и во декември да ја намали каматната стапка по четвртина процентен поен.
Аналитичарот Тимо Емден посочува на влијанието на „коктел од несигурности“ кои негативно се одразува и на вредноста на криптовалутите кои во еден ден изгубија десетина проценти од својата вредност.
На падот на вредноста на акциите влијаеше и загриженоста на инвеститорите за состојбата на компаниите во технолошкиот сектор. Минатата недела водечките американски технолошки компании презентираа разочарувачки квартални извештаи. Ова беше сигнал за инвеститорите на берзите масовно да ги продаваат своите акции од компаниите од технолошкиот сектор.
Дополнителен фактор за несигурност на берзите има и конфликтот на Блискиот Исток, а расте загриженоста и од порастот на цената на енергијата, бидејќи околу 100 милиони барели нафта производство потекнува од овој тензичен регион, пишува „Дојче веле“.
фото freepic