Финансии / Банкарство
ЕЦБ И НАРОДНА БАНКА НА СРБИЈА ГИ НАМАЛИЈА КАМАТИТЕ, а Советот на Народната банка на Македонија денеска го објави Извештајот за финансиската стабилност за 2023 година
12.09.2024
Управниот совет на Европската централна банка (ЕЦБ) денеска одлучи да ја намали каматната стапка на депозитите за 25 базични поени на 3,5 отсто.
Каматната стапка на главните операции ќе биде намалена на 3,65 отсто, додека стапката на маргиналните кредитни олеснувања се намалува на 3,90 отсто, соопштија од ЕЦБ. Оваа промена стапува на сила на 18 септември 2024 година, пренесува Н1.
Извршниот одбор на Народна банка на Србија одлучи на денешниот состанок да ја намали референтната каматна стапка на 5,75 отсто. По пауза од еден месец, НБС продолжи со релаксирање на монетарната политика и со намалување на каматните стапки за 0,25 процентни поени. Истовремено се намалени и стапките за депозитни олеснувања на 4,5 отсто, како и стапката на кредитни олеснувања на седум отсто, објави „Данас“.
Советот на Народната банка на Македонија ја одржа својата редовна седница на која, меѓу другото, го усвои Извештајот за финансиската стабилност за 2023 година. Во Извештајот се оценува дека домашниот финансиски систем е стабилен, добро се справува со предизвиците и дека е отпорен на шокови. Амбиентот во 2023 година беше поповолен, со постепено забавување на инфлацијата, но и забавен економски раст, како и неизвесности и ризици од окружувањето
ЕЦБ очекува стапката на инфлација во еврозоната да биде 2,5 отсто во 2024 година и да падне на 2,2 отсто во 2025 година и 1,9 отсто во 2026 година, што е исто како и во јунската прогноза.
Според прогнозата на ЕЦБ, основната стапка на инфлација ќе падне на 2,9 отсто оваа година, на 2,3 отсто во 2025 година и на два отсто во 2026 година.
- Условите за финансирање остануваат рестриктивни, а економската активност останува пригушена, како одраз на слабата приватна потрошувачка и инвестиции, се вели во соопштението.
Европската централна банка очекува економски раст на еврозоната во 2024 година од 0,8 отсто и забрзување до 1,3 отсто во 2025 година и 1,5 отсто во 2026 година, што е нешто помалку од јунската прогноза, објавија медиумите во регионот.