Финансии / Банкарство
ДОЛАРОТ СО МИНИМАЛЕН РАСТ ВО ОДНОС НА ЕВРОТО, следните денови се очекува одлука од ФЕД за каматните стапки
16.09.2024
Курсот на доларот кон еврото минатата недела минимално порасна, откако Европската централна банка ги намали каматните стапки. Вредноста на доларот ќе зависи од одлуката на Федералните резерви од најавите за намалување на каматите.
Индексот на доларот, кој ја покажува вредноста на американската валута кон шесте најважни светски валути, минатата недела ослабна за минимални 0,1 отсто. Вредноста на доларот кон еврото „зајакна“ за 0,1 отсто и едно евро се разменуваше за 1,1075 долари. Но доларот ослабна кон јапонскиот јен за еден отсто и се разменуваше за 140,85 јени.
Европската централна банка во четвртокот ги намали клучните каматни стапки за 0,25 процентни поени, по втор пат годинава, со цел да го стимулира растот на економијата на еврозоната. Каматната стапка за рефинансирање на банките во иднина ќе изнесува 3,65 отсто, а каматната стапка на депозитите преку ноќ на банките ќе биде 3,5 отсто. Комерцијалните банки ќе плаќаат каматна стапка од 3,9 отсто за кредитите преку ноќ.
Во фокусот на инвеститорите минатата недела беа извештаите за инфлацијата во САД, што може да влијае на одлуката на шефот на американската централна банка за каматните стапки на седницата следната недела.
фото freepic