Бизнис
КОРЕКЦИЈА НА МИНИМАЛНАТА ПЛАТА ПО РАБОТЕН ЧАС ВО ГЕРМАНИЈА
30.06.2025
Минималната плата во Германија треба да се зголеми со две корекции на 14,60 евра на час до 1 јануари 2027 година. На почетокот на следната година, надоместокот за еден час работа ќе изнесува 13,90 евра, според планот на Комисијата за минимална плата. Моментално, минималната плата за еден час работа во Германија изнесува 12,82 евра.
Компромисот предложен од претседателката Кристијане Шенефелд беше едногласно усвоен. Комисијата за минимална плата одлучува на секои две години за прилагодување на тој износ. Одлуката за сегашното ниво на минималната плата е донесена против гласот на синдикатот, со одлучувачки глас на претседателот на комисијата.
Овој пат, рече Шенефелд, е постигнат одржлив компромис што обезбедува рамнотежа помеѓу интересите на работниците и компаниите.
Во врска со очекувањата на јавноста минималната плата да биде 15 евра - што го бараат Социјалдемократите (СПД) - таа изјави дека преговорите биле многу тешки.
Ова го потврди и главниот преговарач на Германската конфедерација на синдикати, Стефан Керцел.
Претставникот на работодавачите, Стефен Кампетер, се пожали на голем политички притисок врз комисијата во последните месеци.
Минималната плата во Германија ја воведе владата на христијанско-демократската канцеларка Ангела Меркел во 2015 година.
Кога минималната плата по час се зголеми на 12 евра во октомври 2022 година, владата на социјалдемократот Олаф Шолц, по исклучок, го презеде донесувањето одлуки наместо комисијата.
Новиот канцелар Фридрих Мерц (ЦДУ) јасно изјави дека „нема да има правен автоматизам“.
Клучен фактор за одредување на долната граница на платата е минатиот развој на платите според колективниот договор, кој го пресметува Федералниот завод за статистика.
Дополнително, медијалната плата се користи како референца. Минималната плата е соодветна ако е 60 проценти од националната просечна плата, односно статистички пресметаната половина, пренесува Б92.
фото freepic