Финансии / Банкарство
Вредноста на доларот достигна најниско ниво
02.07.2025
На денешното тргување на повеќето азиски берзи, цените на акциите паднаа, по вчерашните падови на Волстрит, додека вредноста на доларот во однос на кошничката валути достигна најниско ниво за повеќе од три години. Азиско-пацифичкиот берзански индекс MSCI се намали за 0,2 проценти. Цените на акциите во Шангај, Јапонија и Јужна Кореја паднаа помеѓу 0,1 и 0,9 проценти. Во Хонг Конг и Австралија, тие пораснаа помеѓу 0,6 и 0,7 проценти.
Повеќето азиски берзи ги следат сигналите од Волстрит, каде што индексите S&P 500 и Nasdaq се лизнаа од рекордните нивоа. Иако Dow Jones зајакна за 0,91 процент, S&P 500 ослабе за 0,11, а индексот Nasdaq за 0,82 проценти.
На вчерашното тргување најмногу паднаа цените на акциите на неколку технолошки гиганти, кои силно растеа во последните недели. Аналитичарите велат дека пазарот е преценет по скокот на цените во минатиот квартал, па затоа вчерашната корекција не е изненадувачка.
На валутните пазари, доларот падна на најниско ниво во однос на кошничката валути од март 2022 година, бидејќи инвеститорите се загрижени за буџетскиот дефицит на САД и растечкиот јавен долг. Индексот на доларот, кој ја мери вредноста на американскиот долар во однос на шест други главни валути, утрово беше околу 96,65, што е намалување од претходното ниво 96,88.
Европската валута се зголеми од вчерашните 1,1790 долари на 1,1795 долари, што е блиску до највисокото ниво од септември 2021 година. Американската валута исто така ослабе во однос на јапонскиот јен, при што доларот се продаваше за 143,55 јени, што е намалување од 143,70 јени.
Цените на нафтата малку пораснаа. На лондонскиот пазар денеска цената на барелот се зголеми за 0,13 проценти, на 67,20 долари, додека на американскиот пазар, цената на барелот се зголеми за 0,08 проценти, на 65,50 долари, пренесува Индекс.хр.
фото freepic