Финансии / Банкарство
Во Хрватска со законски измени се овозможува користење на бесплатни банкарски сметки
09.07.2025
Пред пратениците во хрватскиот парламент вчера се доставени законските измени што би им овозможиле на граѓаните со редовни приходи да отворат банкарска сметка и да ја користат бесплатно. Министерството за финансии во Хрватска најавува дека овие измени сè треба да стапат на сила на почетокот на 2026 година, а целта е да се олесни пристапот до основни финансиски услуги и да се отстранат голем број непотребни такси.
Главниот советник на министерот за финансии, Матеј Буле, вели дека новиот пакет ќе им биде достапен на сите граѓани кои примаат редовни приходи (плата, пензија или надоместоци) на нивната банкарска сметка. Сепак, користењето на тој пакет нема да биде автоматско, туку секој корисник ќе мора самиот да побара премин на моделот на бесплатна сметка, изјави тој за ХРТ.
Како дел од тој пакет, граѓаните ќе можат бесплатно да отвораат, затвораат и управуваат со сметки, да користат мобилно или интернет банкарство (во зависност од изборот на корисникот), да подигнуваат и депонираат готовина бесплатно, да примаат домашни и меѓународни плаќања и да издаваат и користат дебитна картичка. На прашањето дали истите правила важат за сите банки, Буле рече дека пакетот ќе се применува подеднакво за сите потрошувачи, објави „Пословни дневник“.