Финансии / Банкарство
ЕЦБ ЌЕ ЈА ПРОВЕРУВА ОТПОРНОСТА НА БАНКИТЕ НА РАЗЛИЧНИ СЦЕНАРИЈА ОД ГЕОПОЛИТИЧКИТЕ РИЗИЦИ
17.07.2025
Европската централна банка (ЕЦБ) планира да ја провери отпорноста на банките во еврозоната на геополитички превирања следната година, изјави главниот супервизор Клаудија Бух, во контекст на сè поизразени ризици, вклучувајќи ги тарифите и санкциите.
ЕЦБ долго време предупредува дека геополитиката е меѓу најголемите ризици за банките во еврозоната поради конфликтите во Украина и окупираниот палестински појас Газа и трговската војна што ја започна американскиот претседател Доналд Трамп.
Централната банка на еврозоната одлучи да ја испита отпорноста на банките на овој вид ризик, менувајќи го претходниот модел на проверки.
ЕЦБ обично им презентира неколку можни сценарија на банките, а тие мора да пресметаат колку капитал би изгубиле ако се остварат.
Во новиот преглед, ЕЦБ ќе им обезбеди примери за нивоата на исцрпување на капиталот и ќе ги замоли самите да смислат сценарија за активирање.
„Во тематскиот стрес тест во 2026 година, ќе го следиме тестот од оваа година и ќе ги замолиме банките да проценат кое сценарио за геополитички ризик би можело сериозно да влијае на нивната солвентност“, изјави Бух пред европратениците.
Како дел од редовниот надзор на ЕЦБ, на банките им е кажано да ја земат предвид изложеноста кон други земји, преку операции во странство и преку кредити за извозници, изјавија извори од централната банка за Ројтерс.
Кибер нападите исто така се сметаат за ризик, особено во балтичките земји. Портпаролот на ЕЦБ одби да ги коментира наводите на изворите, пренесува Сеебиз.
фото freepic