Финансии / Банкарство
На среден рок инфлацијата да биде на нивото во еврозоната, една од главните пораки на гувернерот на Народна банка од средбата со стопанствениците
23.07.2025
Банкарскиот сектор е стабилен, со историски висока капитална адекватност, што претставува значаен потпорен столб за економската стабилност и за економијата во целина. Народната банка е доследна во одржувањето на макроекономската стабилност како најсоодветен амбиент за водење бизнис и создавање поволни услови за раст и развој на домашната економија. Извршната власт има разбирање дека треба да се стремиме кон ниски стапки на инфлација, кон нивото што се постигнува во еврозоната. Ова се главните пораки што гувернерот на Народната банка, Трајко Славески ги упати од вчерашната работна средба со претседателот на Стопанската комора на Македонија, Бранко Азески, на која присуствуваа и членови на Управниот одбор на Комората и на претставници на медиумите.
- Девизните резерви се стабилни и се движат меѓу 4,6 и 4,7 милијарди евра. Тоа претставува соодветно ниво, со оглед на тоа што резервите покриваат околу 4,5 месеци од увозот на стоки и услуги, односно над светскиот стандард од 3 месеци. Управувањето со резервите се врши внимателно, согласно утврдените принципи на сигурност и ликвидност, со постојан надзор од стручните служби на Народната банка, изјави гувернерот Славески.
Во однос на прашањето за намалување на инфлацијата, првиот човек на Народната банка, посочи дека „треба да се стремиме кон ниски стапки на инфлација, кон нивото што се постигнува во еврозоната“.
- Имавме средба со премиерот, му кажавме дека може да се најдеме во ситуација нашите цели да се конфликтни зашто секоја влада сака да го забрза растот. Но во последните 4 - 5 години голем број политичари во светот ги загубија изборите токму поради незадоволството на граѓаните од високата инфлација, како што беше случајот со САД. Победата на Трамп, во краен случај, ја донесе незадоволството од високите цени и високата инфлација, рече гувернерот на Народна банка.
Славески посебно се осврна на фактот дека перцепцијата на граѓаните за инфлацијата е сосема различна од податоците за инфлацијата што ја прикажува статистиката.
-За нив инфлацијата е 40 - 50 проценти. Пред 2,5 години миење автомобил беше 250 денари, а сега е 500 денари. Тоа е перцепцијата на граѓаните. Никој не верува дека инфлацијата е 2,5 или 3 отсто. Граѓаните, по моја проценка, имаат памтење од 4 до 5 години за нивото на цените. Мислам дека имаме разбирање кај извршната власт, дека им користи ниска инфлација. На среден рок ќе се стремиме инфлацијата да биде на ниво на она што е во еврозоната, потенцира гувернерот.
Во однос на кредитирањето, тој порача дека НБ не е пречка за финансирање на бизнисот ако се нудат издржани проекти.
Претседателот на Стопанската комора Бранко Азески повтори дека за компаниите се уште клучни проблеми се борбата против корупцијата и на сложените банкарски процедури за граѓаните и компаниите.
- Борбата против корупцијата е врвен приоритет на Комората. Централната власт и другите власти знаат често да стават рака во џебовите на приватниот сектор. Сите се колнеме во транспарентност, а транспрентноста никаде ја нема, на пример за државната помош со странските инвеститори, за стоковните резерви, за девизните резерви, рече Азески.
Во однос на кредитирањето, тој порача дека НБ не е пречка за финансирање на бизнисот ако се нудат издржани проекти.
Гувернерот на Народната банка Трајко Славески го актуелизираше прашањетo за воведување закон за личен банкрот и како што забележа „не може до бесконечност да се толерираат луѓе кои не во состојба да ги подмируваат своите обврски“.