Глобалната инфлација годинава ќе остане висока, а потрошувачките цени ќе се зголемат во просек за четири проценти во светот, се очекувањата на Германскиот институт за економски истражувања IFO, врз основа на спроведената анкета.

Институтот ИФО, чие седиште е во Минхен, ги објави резултатите од кварталната анкета меѓу економските експерти ширум светот.

- Очекувањата за краткорочните и долгорочните стапки на инфлација остануваат релативно непроменети на глобално ниво, се вели во соопштението на ИФО, објавено од агенцијата DPA.

Иако се непроменети од претходниот квартал, прогнозите за инфлацијата во 2025 година значително варираат од регион до регион, покажува анкетата, со најниска прогноза за Западна Европа од 1,8 проценти.

Во Северна Америка, северна Европа и Океанија, се очекува стапките на инфлација да бидат малку повисоки, од 2,7 до 3,1 процент.

Забележливо е дека очекувањата во Северна Америка остануваат зголемени во споредба со крајот на претходната година, што ги одразува сè уште постојните инфлаторни притисоци, се вели во соопштението.

Најголемите зголемувања на цените се очекува во Источна и Северна Африка, каде што се очекува инфлацијата да достигне 22,9 и 40,8 проценти оваа година, пренесува Бизнис.ба.