Финансии / Банкарство
БЕСЕНТ ОЧЕКУВА „ЗНАЧИТЕЛНО ПОВИСОКИ ПРИХОДИ ОД НОВИТЕ ЦАРИНИ“
20.08.2025
Американскиот министер за финансии Скот Бесент очекува значително повисоки царински приходи оваа година од претходно проценетите 300 милијарди долари (257,2 милијарди евра), додавајќи дека тие ќе бидат искористени за намалување на огромниот долг на земјата.
„Реков дека царинските приходи оваа година би можеле да бидат 300 милијарди долари. Ќе морам значително да ја ревидирам таа бројка“, рече Бесент во интервју за CNBC.
Министерот за финансии одби да даде конкретни нови прогнози за приходите, но рече дека тој и претседателот Доналд Трамп се „многу фокусирани“ на отплата на долгот.
Приходите од царина, исто така, ќе бидат искористени за намалување на буџетскиот дефицит како дел од бруто домашниот производ (БДП), додаде тој.
Министерот за финансии изјави дека секоја инвестиција во американскиот производител на чипови Интел, кој се бори со проблеми, ќе биде насочена кон стабилизација на компанијата, но дека владата нема да ги принудува американските компании да купуваат чипови на Интел.
На прашањето дека во администрацијата на САД размислуваат да купат 10 проценти од акциите на „Интел“, Бесент за CNBC изјави дека последното нешто што би го направил е да го купи уделот, а потоа активно да се обиде да ја зголеми продажбата или да привлече нови клиенти.