Финансии / Банкарство
ЈУЛСКАТА ИНФЛАЦИЈА ВО ЕВРОЗОНАТА Е ДВА ОТСТО, храната поскапела за 3,3 отсто
20.08.2025
Годишната инфлација во eврозоната за јули изнесува два отсто, што е исто како и во јуни и е во согласност со прелиминарните проценки, објави денеска Евростат.
Во услужниот сектор на еврозоната, во јули е забележана инфлација од 3,2 отсто на годишно ниво, што претставува забавување во споредба со 3,3 отсто во јуни.
Цените на храната, алкохолот и тутунот се зголемија за 3,3 отсто на годишно ниво, со побрзо темпо од 3,2 отсто во јуни, а цените на индустриските стоки освен енергијата за 0,8 отсто на годишно ниво, исто така забрзувајќи во споредба со 0,5 отсто во јуни.
Цените на енергијата во еврозоната се намалија за 2,4 отсто на годишно ниво.
Годишната стапка на базична инфлација во еврозоната е 2,3 отсто, што е исто како и во јуни и мај и најниска од јануари 2022 година, се додава во извештајот на веб-страницата на Евростат.
Во Германија, годишната инфлација во јули се намали на 1,8 отсто, во Италија на 1,7 отсто, додека во Франција беше стабилна на 0,9 отсто, а во Шпанија се искачи на 2,7 отсто, пренесува Еуроњуз.